U Homielskim cyrku pakazali prahramu da 80‑hodździa pieramohi — ź siarpom, mołatam i šturmam Rejchstaha
Na arenie demanstrujuć sceny frantavoha žyćcia, ale z udziełam dresiravanych miadźviedziaŭ, sabak i marskich ilvoŭ.
Fota: anna_kutsakova / Instagram
Na sajcie Homielskaha dziaržcyrka hetu pastanoŭku apisvajuć jak sumiesnuju pracu samoha cyrka i Rasijskaj dziaržaŭnaj cyrkavoj kampanii. Aŭtary apisańnia nie škadujuć epitetaŭ:
«Heta nie prosta šou — heta padarožža ŭ časie. Vy pabačycie vajnu vačyma vieteranaŭ: pieršy boj, listy z doma, kancerty na pieradavoj, šturm Rejchstaha i tryŭmfalny Parad pieramohi.
Kožny epizod — asobnaja historyja, raskazanaja praz hałavakružnyja cyrkavyja numary, jakija zrabilisia mietafaraj mužnaści i mocy duchu».
Jakim čynam u homielskim cyrku sabralisia ŭsio heta raskazvać?
Naprykład, u prahramie ŭdzielničajuć pavietranyja himnasty, akrabaty i žanhlory, čyje vystupy «ŭvasablajuć hieraizm sałdataŭ». Taksama abiacajuć pakazać sceny frantavoha žyćcia, ale z udziełam dresiravanych miadźviedziaŭ, sabak i marskich ilvoŭ.
Fota: anna_kutsakova / Instagram
Jašče ŭ prahramie jość «lehiendarny konny atrakcyjon imia narodnaha artysta Rasii Tamierłana Nuhzarava», u jakim udzielničajuć 19 koniej. Abiacajuć rarytetnyja matacykł i samalot, vajskovuju formu vajennych časoŭ i vystupy ŭ styli cyrkavych artystaŭ 40-ch, jakija ŭdzielničali ŭ frantavych bryhadach.
Fota: gomel_circus / Instagram
Dla poŭnaha pahružeńnia ŭ epochu padčas šou pakazvajuć archiŭnyja videa, uklučajuć staruju muzyku i śpiecefiekty nakštałt śviatła i dymu.
Pieršyja naviedniki ŭžo zacanili pastanoŭku ŭ kancy kastryčnika, i ŭ siecivie bahata zdymkaŭ i videa z toj prahramy. Dziakujučy im my viedajem, što nakont formy ŭ anonsie nie schłusili: na kadrach možna ŭbačyć pavietranych himnastaŭ u ampłua savieckich sałdat, dziaŭčat u sukienkach u duchu 40-ch, cyrkačak z pafarbavanymi vusnami ŭ avijašlemach, jakija vykočvajuć na arenu madel samalota. I čyrvony ściah ź siarpom i mołatam.
Fota: anna_kutsakova / Instagram
Pakazvać šou płanujuć da 30 listapada.