Bitva ŭ Kiolnie: Zankaviec suprać Chenłana
Ad 7 da 23 maja ŭ Hiermanii projdzie 74‑y čempijanat śvietu pa chakiei z šajbaj. 11‑y raz zbornaja Biełarusi voźmie ŭdzieł u matčach elitnaha dyvizijona.
Ad 7 da 23 maja ŭ Hiermanii projdzie 74‑y čempijanat śvietu pa chakiei z šajbaj. U 11‑y raz zbornaja Biełarusi voźmie ŭdzieł u matčach elitnaha dyvizijona.
U hrupu «A» razam ź Biełaruśsiu trapili Rasija, što pieramahała ŭ dvuch apošnich čempijanatach śvietu, paŭfinalisty Alimpijady sa Słavakii, a taksama Kazachstan, jakija viarnuŭsia ŭ najvyšejšy dyvizijon.
Hulać biełarusy buduć u Kiolnie na «Łanksies‑Arenie». A matč adkryćcia pieršynstva pamiž zbornymi ZŠA i Hiermanii projdzie ŭ Hielzienkirchienie na futbolnaj «Fiełtyns‑Arenie» — dziela hetaha na joj zalijuć lod. Arena źmiaščaje 75 976 hledačoŭ. Takim čynam budzie pabity rekord naviedvalnaści matčaŭ chakiejnych čempijanataŭ śvietu.
Dla vychadu z hrupy biełarusam dastatkova zaniać nie apošniaje miesca. Kali heta ŭdasca,
u kvalifikacyjnym raŭndzie našy chłopcy sustrenucca z tryma najlepšymi kamandami hrupy «D», dzie sabralisia ZŠA, Hiermanija, Danija i Finlandyja.
Na čempijanat zbornaja jedzie z novym hałoŭnym trenieram, 41‑hadovym Eduardam Zankaŭcom. Pikantnaść situacyi ŭ tym, što jašče letaś Zankaviec dapamahaŭ u zbornaj kanadcu Hlenu Chenłanu. U Kiolnie ž Zankaviec i Chenłan, jaki paśla biełaruskaj uznačaliŭ słavackuju zbornuju, buduć pa roznyja baki barykadaŭ.
Na minułym čempijanacie ŭ Šviejcaryi biełarusy zmahli trapić u vaśmiorku najmacniejšych.
Sioleta ad kamandy čakajuć nie mienš paśpiachovaha vystupu.
Siarod tych, chto pakul nie dajechaŭ u zbornuju — braty Kaścicyny. Ich «Manreal» u Kubku Stenli niečakana pieramoh u sieryi «Vašynhton», a ciapier jany buduć zmahacca z «Pitsburham». Traŭmavany taksama Kanstancin Kalcoŭ z «Sałavata Jułajeva».
Byŭ skandał i z našym asnoŭnym varatarom Andrejem Miezinym, jaki navat pakinuŭ bazu zbornaj i źjechaŭ u Kijeŭ, bo minskaje «Dynama» nie chacieła praciahvać z hałkipieram kantrakt. Ale potym pytańnie z Andrejem było vyrašana stanoŭča. Jon budzie na čempijanacie.
Što da niebiełaruskich spravaŭ čempijanatu, to cikava, ci paŭtorycca treci hod zapar finał pamiž Rasijaj i Kanadaj. Ale što zrobiš, kłasika žanru.
Źmicier Pankaviec
Raskład hulniaŭ zbornaj Biełarusi
9 maja (niadziela). Biełaruś — Kazachstan. Pačatak u 17:15.
11 maja (aŭtorak). Biełaruś — Słavakija. Pačatak u 21:15.
13 maja (čaćvier). Rasija — Biełaruś. Pačatak u 17:15.
Dla tych, chto nie zmoža padtrymać zbornuju ŭ Hiermanii, buduć pramyja tranślacyi na telekanale «Ład».