Polski hienierał: Kali tolki Rasija napadzie na NATA, na 300 kiłamietraŭ u hłybiniu jaje budzie vypalenaja ziamla

Były kamandujučy Jeŭrakorpusam Jarasłaŭ Hramadziński raskazaŭ pra stratehiju strymlivańnia Rasii i zrabiŭ prahnozy.

Hienierał Jarasłaŭ Hramadziński. Fota: Jarosław-Gromadziński / Facebook

«Naš dziaržaŭny intares palahaje ŭ tym, kab pakazać siabie mocnaj i rašučaj krainaj. Razam z tym, kali na nas napaduć, my pakidajem za saboj mahčymaść uvajści i likvidavać pahrozu z boku Kalininhradskaj vobłaści», — zajaviŭ u intervju polskamu vydańniu «Fakt» były kamandujučy Jeŭrakorpusam, hienierał Jarasłaŭ Hramadziński.

Jon patłumačyŭ, što dla błakavańnia Kalininhradskaj vobłaści spatrebicca zadziejničać u try razy bolš sił, čym dla jaje poŭnaj likvidacyi.

«Kali Rasija navažycca na ataku (na Polšču i NATA — red.), my majem poŭnaje prava ŭvajści tudy i likvidavać pahrozu. U vojsku my hadami žyli z dumkaj, što Kalininhrad — heta bunkier, jaki my pavinny ličyć niedatykalnym. Jany mohuć pa nas stralać, a my pa ich — nie ŭ poŭnaj miery. Siońnia treba skazać jasna: «Kali vy napadziacie na nas, to my možam uvajści tudy, i vy pavinny heta ŭličvać pry płanavańni», — prakamientavaŭ hienierał.

Na dumku byłoha vajskoŭca, Polšča i inšyja krainy NATA pavinny stvarać dla Kramla stratehičnyja dylemy, jakija strymlivajuć ahresiŭnyja namiery Rasii.

«Nam patrebna zrazumiełaja stratehija biaśpieki, jakaja vyrazna akreślivaje našy dziaržaŭnyja intaresy i demanstruje našu rašučaść baranić ułasnuju krainu.

Heta nie ahresija. My poŭnyja rašučaści abaraniacca i adnačasova pakazvajem: my nie chočam hetaha rabić, ale kali budziem zmušanyja heta zrabić, to zrobim heta z poŭnaj rašučaściu — na 300 kiłamietraŭ budzie vypalenaja ziamla, a na 900 kiłamietraŭ — padpalenaja. Heta jasny sihnał», — padkreśliŭ surazmoŭca.

Jak adznačaje vydańnie, pra toje, što NATA ŭ svaich płanach na vypadak kanfrantacyi z Rasijaj pavinna ŭličvać mahčymaść zaniaćcia Kalininhradskaj vobłaści, kažuć usio bolš kamandujučych i analitykaŭ. Tak, naprykład, u listapadzie viarchoŭny hałoŭnakamandujučy siłami NATA ŭ Jeŭropie hienierał Aleksus H. Hrynkievič zajaviŭ, što ŭ Aljansa ŭžo jość hatovyja płany dziejańniaŭ u adnosinach da Kalininhradskaj vobłaści.

«Rasija taksama praličvaje varyjanty i analizuje, jak my funkcyjanujem. Kali ŭ nas budzie stratehija nacyjanalnaj biaśpieki, u jakoj my dakładna prapišam našy pryncypy, kryteryi i ŭzrovień ambicyj — a hałoŭnaje, zapišam, što ŭ vypadku napadu na našu krainu my vykarystajem usie najaŭnyja srodki dla źniščeńnia praciŭnika, u tym liku pakidajučy za saboj prava ŭvachodu na jaho terytoryju, — tolki tady heta stanie dla ich jasnym pasyłam», — davodzić hienierał Hramadziński.

Rasija viedaje svaje słabyja miescy, ale chutka vučycca

Hienierał padkreśliŭ, što z pryčyny vielizarnych strat na froncie va Ukrainie rasijskija vojski pakul nie ŭjaŭlajuć niepasrednaj pahrozy dla Polščy i inšych krain NATA. Pavodle jaho słoŭ, uličvajučy maštab strat na froncie va Ukrainie, Rasija zmoža adnavić patencyjał dla čarhovaj ataki tolki praz 5‑6 hadoŭ.

«Pavodle roznych krynic, ahulnyja straty rasijskich sałdat składajuć kala 900 tysiač, ź jakich niezvarotnyja straty — prykładna 250—300 tysiač. Heta vielizarnyja čałaviečyja straty. Akramia taho, Rasija straciła kala 11 tysiač tankaŭ, 20 tysiač bajavych mašyn piachoty, 25 tysiač adzinak artyleryi i 1300 reaktyŭnych sistem załpavaha ahniu. Dadajcie da hetaha 370 samalotaŭ, 330 viertalotaŭ i bolš za 2,5 tysiačy hruzavych aŭtamabilaŭ.

Kolki času spatrebicca, kab vyrabić usio heta nanova? Rasija nie zdolnaja chutka adnavić straty, bo joj prosta brakuje resursaŭ, syraviny i dostupu da technałohij. Na maju dumku, Rasii spatrebicca kala 5‑6 hadoŭ, kab adnavicca ŭ vajennym płanie», — acaniŭ situacyju ekśpiert.

Hienierał padkreśliŭ, što navat fizičnaje adnaŭleńnie vajennaha patencyjału nie harantuje imhniennaj hatoŭnaści da boju, bo techniku nieabchodna raźmierkavać pa vojskach, a asabovy skład — navučyć.

«Rasija ŭśviedamlaje, što nie maje mahčymaści pravodzić jašče adnu apieracyju za miežami Ukrainy. Navat amierykancy jasna padkreślivajuć, što zdolnyja vieści tolki adnu vialikuju poŭnamaštabnuju stratehičnuju apieracyju na adnym kirunku», — cytuje vydańnie słovy hienierała.

Tym nie mienš surazmoŭca vydańnia pieraściaroh, što Kreml aktyŭna rychtujecca da mahčymych uvarvańniaŭ u Jeŭropie ŭ budučyni. Pra heta śviedčyć reforma struktury Zachodniaj vajskovaj akruhi z vyłučeńniem Leninhradskaj akruhi, a taksama praviadzieńnie vučeńniaŭ «Zachad» dla adpracoŭki dziejańniaŭ u novych umovach.

Na dumku hienierała, Polšča i Jeŭropa ŭžo faktyčna znachodziacca ŭ stanie vajny z Rasijaj, jakaja viadziecca hibrydnymi mietadami «nižej za paroh vajny».

«Adbyvajucca dyviersii, my bačyli situacyi z dronami nie tolki ŭ Polščy, ale i ŭ Jeŭropie, dzie bieśpiłotniki paralizavali pracu cełych aeraportaŭ. Fiksujucca sproby paškodžańnia čyhunačnych puciej i masavyja padpały, i ŭsio heta supravadžajecca dezinfarmacyjaj u siecivie. Tut niama ničoha, što pavinna nas ździŭlać. Treba pryniać jak fakt, što my znachodzimsia ŭ stanie piermanientnaj hibrydnaj vajny», — padsumavaŭ hienierał.

Kamientary da artykuła