Talenavitaha prahramista adpravili za kraty. Jon uvachodziŭ u top-0,2% śpiecyjalistaŭ u svaim kirunku

Raman Basałaj — vysakakłasny śpiecyjalist pa ŭbudavanych sistemach (Embedded) z surjoznym navukovym bekhraŭndam. Niadaŭna jaho asudzili za «spryjańnie ekstremisckaj dziejnaści».

Raman Basałaj. Fota ź jahonaj staronki Ukantakcie

Ramanu Basałaju 43 hady. Jon vypusknik Połackaha dziaržaŭnaha ŭniviersiteta: u 2004 hodzie skončyŭ elektratechničny fakultet z čyrvonym dypłomam, paśla čaho vučyŭsia ŭ aśpirantury.

Raman — čałaviek navuki. Za jahonymi plačyma pieramohi ŭ alimpijadach u fizicy i matematycy, navukovyja publikacyi i čatyry zajaŭki na patenty. U jaho roznabakovyja intaresy: ad ihry na barabanach da radyjoelektroniki. Maje žonku i niepaŭnaletniuju dačku.

Doŭhi čas mužčyna pracavaŭ inžynieram-prajekciroŭščykam sietak, a sa śniežnia 2023 hoda ŭładkavaŭsia raspracoŭščykam u kampaniju Passat Innovations. Tam jon zajmaŭsia stvareńniem drajvieraŭ dla čypaŭ, raspracoŭkaj intelektualnych krynic bieśpierabojnaha siłkavańnia i sistem hałasavoj suviazi.

Uzrovień Basałaja pakazvaje jahony rejtynh na płatformie CodeWars: biełarus uvachodziŭ u top-0,168% karystalnikaŭ pa vyrašeńni zadač na C/C++ i zajmaŭ 1183 miesca ź miljonaŭ karystalnikaŭ płatformy.

Skrynšot statystyki Ramana Basałaja na płatformie CodeWars. Skrynšot ź jahonaha Linkedin

Ramana zatrymali ŭ krasaviku 2025 hoda. Minski abłasny sud pryznaŭ jaho vinavatym pavodle častak 1 i 2 artykuła 361‑4 Kryminalnaha kodeksa («sadziejničańnie ekstremisckaj dziejnaści»).

Z taho času jon nie źjaviŭsia anłajn — vyhladaje, što pakarańnie Ramanu źviazanaje z pazbaŭleńniem voli.

Kamientary da artykuła