Hrodzienskaha prahramista z 23‑hadovym stažam adpravili za kraty za palityku

Pad katok represij trapiŭ 49‑hadovy Rusłan Barančyk. Bolšuju častku darosłaha žyćcia jon pryśviaciŭ pracy ŭ IT-śfiery i adukacyi.

Rusłan Barančyk. Fota ź jahonaj staronki Vkontaktie

Rusłan Barančyk skončyŭ matematyčny fakultet Hrodzienskaha dziaržaŭnaha ŭniviersiteta imia Janki Kupały. Jon pačynaŭ pracavać u svajoj alma-mater, u vydavieckim centry HrDU. Tam Rusłan zajmaŭsia viorstkaj navukovych knih, pisaŭ skrypty dla aŭtamatyzacyi pracesaŭ i administravaŭ sajt.

Paźniej mužčyna pierajšoŭ u kamiercyjnaje IT: pracavaŭ testavalnikam u EPAM Systems, prahramistam u «Intekssoft» i navat zabiaśpiečvaŭ pracu prahramnaha zabieśpiačeńnia na hrodzienskim aŭtavakzale.

Apošnija hady jon pracavaŭ dystancyjna, zajmajučysia SEO-prasoŭvańniem i kopirajtynham. Taksama šukaŭ pracu na vachtu ŭ Rasiju.

Rusłan — čałaviek z mnostvam zachapleńniaŭ. Naprykład, jon lubić astranomiju. Taksama jon daśviedčany karystalnik prahram dla aŭdyjaknih, u čatach dapamahaŭ inšym naładžvać dostup da biblijatek i dzialiŭsia techničnymi paradami.

Prysud Rusłanu vynieśli ŭ Hrodzienskim abłasnym sudzie. Jaho abvinavacili pavodle troch artykułaŭ Kryminalnaha kodeksa: č. 1 art. 130 (raspalvańnie varožaści), č. 1 art. 368 (abraza Łukašenki) i č. 1 art. 361‑4 (sadziejničańnie ekstremisckaj dziejnaści).

Dakładny termin źniavoleńnia nieviadomy, ale jon źviazany z pazbaŭleńniem voli. Doma Rusłana čakajuć žonka i dvoje niepaŭnaletnich dziaciej.

Kamientary da artykuła