U Śvisłackim rajonie źniščyli vialikaje pole maku

U Śvisłackim rajonie supracoŭniki milicyi źniščyli vialikaje pole dzikarosłaha maku, jakoje vyrasła na pryvatnym učastku ŭ vioscy Pacui. Płošča paletku skłała kala adnaho hiektara, a ahulnaja masa źniščanych raślin pieravysiła 3,3 tony.

Fota: UUS Hrodzienskaha abłvykankama

Uładalnicaj ziamielnaha nadziełu źjaŭlajecca 54‑hadovaja miascovaja žycharka. Pavodle jaje słoŭ, jana vysiejvała na paletku pšanicu, tamu źjaŭleńnie vialikaj kolkaści maku stała dla jaje samoj niečakanaściu.

Jak nasieńnie dzikaha maku mahło trapić na heta pole, nie paviedamlajecca. Adnak u vyniku ŭtvaryŭsia jarki čyrvony dyvan z kvietak, jaki vyhladaŭ vielmi pryhoža, ale pryznany niebiaśpiečnym z-za taho, što mak moža vykarystoŭvacca jak syravina dla vyrabu narkatyčnych rečyvaŭ.

Źniščeńnie raślin pravodziłasia ŭ miežach śpiecyjalnaj prafiłaktyčnaj apieracyi «Mak», jakaja štohod prachodzić u Biełarusi. Jana pačałasia 1 červienia i budzie praciahvacca da 15 vieraśnia. Asnoŭnaja meta hetaj kampanii — vyjaŭleńnie i likvidacyja dzikarosłych abo niezakonna vyraščanych narkaźmiaščalnych raślin, u pieršuju čarhu maku i kanoplaŭ.

U Ministerstvie ŭnutranych spraŭ nahadvajuć, što ŭłaśniki ziamielnych nadziełaŭ abaviazany sačyć za svajoj terytoryjaj i svoječasova źniščać takija raśliny. Adsutnaść namieru vyroščvać mak abo kanopli nie zaŭsiody vyzvalaje ad adkaznaści, bo zakon patrabuje nie dapuskać ich rostu na svajoj ziamli.

Za niezakonny pasieŭ abo vyroščvańnie maku i kanoplaŭ biez mety atrymańnia abo raspaŭsiudžvańnia narkatyčnych srodkaŭ moža być administracyjnaja adkaznaść — štraf da 20 bazavych adzinak. Kali ž budzie dakazana, što raśliny vyroščvalisia naŭmysna z metaj vyrabu abo prodažu narkotykaŭ, moža nastupić kryminalnaja adkaznaść, u tym liku pakarańnie ŭ vyhladzie pazbaŭleńnia voli.

Kamientary da artykuła