Lepš pozna, čym nikoli
Łondan aficyjna vybačyŭsia za padziei «kryvavaj niadzieli» 30 studzienia 1972 hoda.
Aŭtorak staŭ histaryčnym dniom dla Paŭnočnaj Irłandyi i Vialikabrytanii. Siemji udzielnikaŭ demanstracyi katalikoŭ, jakija stali achviarami brytanskaj armii, čakali pravasudździa 38 hadoŭ, z 1972 hoda.
Vyniki rasśledavańnia śpiecyjalnaj kamisii nakont kryvavaj niadzieli byli apublikavanyja ŭ brytanskim parłamiencie.
«Vysnovy hetaj spravy całkam jasnyja. Biez sumnieńniaŭ — toje, što zdaryłasia ŭ kryvavuju niadzielu — nie padlahaje apraŭdańniu. Usie toje, što adbyłosia prosta niedapuščalna. Sudździa łord Sevił zaklučyŭ, što brytanskija sałdaty adkryli ahoń pavodle zahadu kamandavańnia. I hetaha zahadu prosta nie pavinna było być.
Ułady niasuć ŭsiu adkaznaść za dziejańni ŭzbrojenych sił, i ad imia brytanskaha ŭrada ja prašu prabačeńnia za našu krainu», — zajaviŭ brytanski premjer‑ministr Devid Kemieran.
Rasśledavańnie pa spravie, viadomaj jak Kryvavaja niadziela (Bllody Sunday), i apytańnie vidavočcaŭ padziej 30 studzienia 1972 hoda ŭ Łondadery (Dery) praciahvałasia 12 hadoŭ, paviedamlaje Jeŭrańjus.
30 studzienia 1972 hoda ŭ horadzie Dery (Łondandery) sałdatami 1‑ha parašutnaha pałka pad kamandavańniem padpałkoŭnika Dereka Viłfarda była rasstralana mirnaja demanstracyja miascovych žycharoŭ‑katalikoŭ. Byli zabityja 13 demanstrantaŭ, u tym liku šaściora niepaŭnahadovych. Piaciora čałaviek byli zastrelenyja ŭ śpinu. Jašče 14 čałaviek byli paranienyja, adzin paźniej pamior.
Brytanskija ŭłady śćviardžali, što demanstranty mieli zbroju i pieršymi adkryli ahoń. «Kryvavaja niadziela» pryviała da novaha kanfliktu pamiž IRA i brytanskaj armijaj u Paŭnočnaj Irłandyi.
Miemaryjał u pamiać zahinułych u Dery.