Arhanizataraŭ «Tur de Frans» zaklikali praviarać biusthaltary viełasipiedystak
Žančyny-viełasipiedystki abdurvajuć sapiernic, karystajučysia zakonami fiziki.
U prafiesijnym žanočym viełasporcie razhareŭsia skandał, źviazany z aeradynamikaj i adzieńniem, paviedamlaje Wieler Flits. Niekalki kamand źviarnulisia da Mižnarodnaha sajuza viełasipiedystaŭ z patrabavańniem pryniać terminovyja miery suprać spartsmienak, jakija štučna pavialičvajuć sabie hrudzi na čas indyvidualnych honak.
Vykarystoŭvajučy śpiecyjalnyja padkładki ŭ spartyŭnyja biusthaltary, honščycy pavialičvajuć pamier hrudziej, ale robiać heta nie dziela pryhažości, a dziela pieravahi ŭ chutkaści.
Sutnaść chitraści ŭ tym, što padkładka źmianiaje formu cieła i kiruje strumieniami pavietra padčas ruchu. Heta pamianšaje supraciŭleńnie pavietra i dazvalaje ekanomić kaštoŭnyja doli siekundy.
Navukovyja daśledavańni paćviardžajuć, što taki psieŭdabiust zdolny skaracić supraciŭleńnie pavietra da 3,6 pracentaŭ, što na dystancyi ŭ 20‑30 kiłamietraŭ daje vyjhryš u niekalki siekund, a ŭ prafiesijnym sporcie mienavita jany časta vyrašajuć los załatoha miedala.
Choć praviły stroha zabaraniajuć užyvać lubyja nakładki abo źmianiać anatamičnuju formu cieła padčas zajezdaŭ pad pahrozaj dyskvalifikacyi i bujnych štrafaŭ, sudździ dahetul amal nie praviarali spartsmienak.
Kamandy zaklikajuć rehulatara ŭvieści abaviazkovy kantrol i praviarać honščyc adrazu paśla finišu, kab viarnuć u sport sumlennuju baraćbu.