14‑hadovaja minčanka zajšła ŭ dadatak dla znajomstvaŭ i addała ŭsie siamiejnyja źbieražeńni
U milicyju źviarnułasia siamja 14‑hadovaj minskaj školnicy. Dziaŭčynka pierapisvałasia z adnahodkam u dadatku dla znajomstvaŭ, a potym pajechała na sustreču ź im da mietro. U vyniku jana addała kurjeru siamiejnyja źbieražeńni — 3500 dalaraŭ, paviedamlaje pres-słužba milicyi.
Kali dziaŭčynka pryjechała na miesca sustrečy, surazmoŭca paprasiŭ jaje adpravić jamu svaju hieałakacyju. Paśla hetaha školnicy pryjšło videapaviedamleńnie ad nieznajomaha mužčyny ŭ mascy. Jon pačaŭ joj pahražać. Spałochaŭšysia, dziaŭčynka zabłakavała jaho.
Nieŭzabavie školnicy patelefanavaŭ mužčyna, jaki nazvaŭsia supracoŭnikam KDB. Jon zajaviŭ, što čałaviek u mascy — teraryst, a samoj dziaŭčyncy nibyta pahražaje kryminalnaja adkaznaść za sadziejničańnie jamu.
Zatym ź joj źviazałasia žančyna, jakaja pradstaviłasia supracoŭnicaj padatkovaj słužby. Pad vyhladam pravierki hrošaj jana pierakanała školnicu znajści doma siamiejnyja źbieražeńni.
Padčas videazvanka dziaŭčynka pakazała žančynie kanviert z 3500 dalarami. Paśla hetaha školnica pierakłała hrošy ŭ kaśmietyčku i pieradała ich kurjeru, jaki pryjechaŭ pa najaŭnyja.
Paźniej vyśvietliłasia, što kurjeram taksama była 14‑hadovaja školnica. Jana sama stała achviaraj padmanu i pa ŭkazańniach machlaroŭ adviezła čužyja hrošy ŭ schovanku ŭ Minskim rajonie.