Pradstaŭniki apazicyi padpisali pahadnieńnie ab kaardynacyi dziejańniaŭ

Pradstaŭniki apazicyi 24 žniŭnia ŭ Minsku padpisali pahadnieńnie ab kaardynacyi dziejańniaŭ padčas najbližejšaj kampanii pa vybarach prezidenta Biełarusi.

Dakumient padpisali lider kampanii «Havary praŭdu!» Uładzimir Niaklajeŭ, staršyni Biełaruskaj partyi levych «Spraviadlivy śviet» Siarhiej Kalakin i Abjadnanaj hramadzianskaj partyi Anatol Labiedźka, lider Jeŭrapiejskaj kaalicyi Mikałaj Statkievič, kiraŭniki arhkamitetaŭ pa stvareńni partyj «Biełaruskaja chryścijanskaja demakratyja» Vital Rymašeŭski i Partyi žančyn «Nadzieja» Alena Jaśkova.

Staršynia Biełaruskaj sacyjał-demakratyčnaj partyi (Hramada) Anatol Laŭkovič nie zmoh prysutničać na padpisańni, ale vykazaŭ hatoŭnaść dałučycca da dakumienta. Akramia taho, staršynia Partyi BNF Alaksiej Janukievič padpisaŭ pahadnieńnie z ahavorkaj, što dziejańni apazicyi na vybarach pavinny być skiravany nie tolki na baraćbu z Alaksandram Łukašenkam, ale i z prarasijskim kandydatam.

Jak paviedamiŭ Viktar Ivaškievič, pradstaŭnik pretendenta na pasadu prezidenta Andreja Sańnikava, lidera kampanii «Jeŭrapiejskaja Biełaruś», palityk vyznačycca adnosna padpisańnia dakumienta na praciahu najbližejšych dvuch dzion.

Pahadnieńnie praduhledžvaje, što demakratyčnyja siły damaŭlajucca:

— pravieści masavuju infarmacyjnuju kampaniju z metaj daniasieńnia da ŭsich žycharoŭ Biełarusi źviestak pra škodu, jakuju nanosić biełaruskamu narodu palityka ciapierašniaj ułady;

— pravieści masavuju mabilizacyjnuju kampaniju siarod vybarščykaŭ, u pryvatnaści pieratvaryć mahčymy pasiŭny pratest u formie niaŭdziełu ŭ vybarach u pratest dziejny, kab bolšaść prahałasavała suprać dziejnaj ułady;

— arhanizavać pracu z členami vybarčych kamisij, a taksama efiektyŭnaje nazirańnie na ŭčastkach z metaj vyjaŭleńnia falsifikacyj i mižnarodnaha niepryznańnia sfalsifikavanych vynikaŭ vybaraŭ;

— naładzić kantakty i pravieści pieramovy z uradavymi čynoŭnikami, rehijanalnymi kiraŭnikami, dyrektarami pradpryjemstvaŭ i aficerami MUS, jakija ŭžo ŭśviadomili, što ŭładu treba mianiać;

— arhanizavać unutrany i źniešni nacisk na ŭłady z metaj źmieny vybarčaha zakanadaŭstva i pravaprymianialnaj praktyki;

— zaklikać usich niazhodnych z vynikami vybaraŭ i niezadavolenych palitykaj uładaŭ uziać udzieł u masavych akcyjach pratestu z patrabavańniem sapraŭdnych svabodnych vybaraŭ.

U adpaviednaści z pahadnieńniem apazicyja biare na siabie abaviazacielstva abmierkavać pytańnie ab stvareńni «kaardynacyjnaha centra kampanii na pryncypach roŭnaści».

Kamientary da artykuła