Sieviaryniec padtrymaŭ prapanovu Paźniaka abjavić 2011 hod Hodam niezaležnaści

Sustaršynia arhkamiteta pa stvareńni partyi «Biełaruskaja chryścijanskaja demakratyja» (BCHD) Pavieł Sieviaryniec padtrymlivaje prapanovu Zianona Paźniaka abjavić 2011 hod Hodam niezaležnaści. Pra heta paviedamlaje pres-słužba BCHD.

Z hetaj inicyjatyvaj lider Kansiervatyŭna-chryścijanskaj partyi — BNF Zianon Paźniak vystupiŭ 20 žniŭnia ŭ efiry radyjo «Svaboda».

25 žniŭnia 2011 hoda spaŭniajecca 20 hadoŭ z momantu jurydyčnaha adnaŭleńnia niezaležnaści Biełarusi. U hety dzień u 1991 hodzie Viarchoŭny Saviet BSSR nadaŭ Dekłaracyi ab dziaržaŭnym suvierenitecie Biełarusi status kanstytucyjnaha zakona. Tym samym biełaruskija zakony atrymali viaršenstva nad zakonami SSSR. Hałasavańnie prachodziła na siesii, jakaja była sklikanaja adrazu paśla paražeńnia žnivieńskaha putču ŭ Maskvie. Pad ciskam deputackaj apazicyi BNF na čale z Paźniakom bolšaść deputataŭ Viarchoŭnaha Savieta prahałasavali za niezaležnaść Biełarusi de-jure. De-fakta Biełaruś nabyła niezaležnaść u śniežni 1991 hoda, paśla padpisańnia Biełaviežskich pahadnieńniaŭ, vynikam jakich staŭ razvał Savieckaha Sajuza.

«U toj čas jak pajšoŭ 20-y hod realnaha dziaržaŭnaha suvierenitetu, niezaležnaść Biełarusi pa-raniejšamu zastajecca hałoŭnym punktam paradku dnia ŭ Biełarusi. Realnaj niezaležnaści — ekanamičnaj, palityčnaj, kulturnaj — nam jašče treba damahčysia», — pierakanany Sieviaryniec.

Pavodle mierkavańnia palityka, «usie biełarusy pavinny ŭspryniać abaronu niezaležnaści jak svoj abaviazak».

Kamientary da artykuła