Płacini padtrymaŭ minskuju milicyju nakont staŭleńnia da zaŭziataraŭ

Prezidentu UEFA Mišelu Płacini nie pastupali skarhi biełaruskich balelščykaŭ na praceduru nadhladu padčas futbolnych matčaŭ. Pra heta jon zajaviŭ, adkazvajučy na pytańnie BiełaPAN na pres-kanfierencyi pa vynikach pasiadžeńnia vykankama UEFA ŭ Minsku 4 kastryčnika.

Płacini adznačyŭ, što ŭ luboj krainie znojducca niezadavolenyja prapusknym režymam na stadyjonach. «Ale kali my chočam arhanizavać biaśpieku, lepš pravieści nadhlad da matču, čym potym razhrabać nastupstvy», — zajaviŭ prezident UEFA.

Što da katehoryj zališniaha i dastatkovaha nadhladu, to, pavodle słoŭ Płacini, heta vyznačaje «miascovaja palicyja».

26 vieraśnia futbolnyja fanaty bajkatavali matčy čarhovaha tura čempijanatu Biełarusi ŭ vyšejšaj lizie, pratestujučy suprać, na ich dumku, zališnie žorstkaj pracedury nadhladu na stadyjonach.

Za dva tydni da taho va UEFA, FIFA i KCHŁ sa skarhami na parušeńnie pravoŭ balelščykaŭ źviarnulisia aktyvisty kampanii «Havary praŭdu!». Jak paviedamlałasia, 7 vieraśnia supracoŭniki milicyi zatrymali pry ŭvachodzie na minski stadyjon «Dynama» kala 50 aktyvistaŭ kampanii «Havary praŭdu!». Ich nie dapuścili na matč adboračnaha turniru Jeŭra-2012 Biełaruś — Rumynija: na ich byli majki z łahatypam kampanii. Majki byli nadzietyja pad vierchniaje adzieńnie. Aktyvisty praviali va UUS Leninskaha rajona bolš za try hadziny i nie zmahli trapić na matč, niahledziačy na kuplenyja bilety. 9 vieraśnia ŭ spartkompleksie «Minsk-Arena» było zatrymana kala 15 aktyvistaŭ kampanii. Amatary chakieja pryjšli na matč Kantynientalnaj chakiejnaj lihi «Dynama» (Minsk) — «Tarpieda» (Nižni Noŭharad). Achova «Minsk-Areny» patrabavała rasšpilić adzieńnie i pakazać, u jakija majki jany apranutyja. Usich, u kaho znajšli majku z łahatypam kampanii «Havary praŭdu!», zatrymali i dastavili va UUS Centralnaha rajona Minska.

«Byli parušanyja pravy ludziej, jakija kupili bilety, ale nie zmahli trapić na futboł i chakiej tolki z-za taho, što na ich byli nadzietyja majki, jakija, na dumku achoŭnikaŭ mierapryjemstva, nie adpaviadali dziaržaŭnaj ideałohii. Ale heta nie maje ničoha ahulnaha z futbołam abo chakiejem», — zajaviŭ pradstaŭnik kampanii.

Jak paviedamiła pres-sakratar «Havary praŭdu!» Julija Rymašeŭskaja, skarhi byli nakiravanyja elektronnaj i zvyčajnaj poštaj. Adkazaŭ pakul niama.

Kamientary da artykuła