Vystava mastackich rabot Judala Pena - Muziej Kołasa

Da 15 śniežnia ŭ Dziaržaŭnym litaraturna-miemaryjalnym muziei Jakuba Kołasa prachodzić vystava mastackich rabot znakamitaha žyvapisca Judala Majsiejeviča Pena pad nazvaj «Majo žyćcio — karciny» z fondaŭ Viciebskaha abłasnoha krajaznaŭčaha muzieja.

Kłasik biełaruskaj litaratury Jakub Kołas byŭ nie tolki słavutym paetam, navukoŭcam, nastaŭnikam, ale i duchoŭnym apiekunom talenavitych asob. Siarod tych, z kim paet siabravaŭ i kamu spryjaŭ, — mastaki Taćciana Žyrmunskaja, Siamion Hierus, Halina Harełava, Janka Łabkoŭski, skulptar Zair Azhur… Tamu i niadziŭna, što mienavita ŭ Domie pieśniara, dzie z časoŭ žyćcia haspadara panuje tvorčaja atmaśfiera, adkryłasia vystava rabot słynnaha biełaruskaha mastaka Juryja Pena, imia jakoha nazaŭždy ŭpisana ŭ historyju suśvietnaj mastackaj škoły.

Pradstaŭlenyja na vystavie ŭ Domie Kołasa 23 karciny z fondaŭ Viciebskaha abłasnoha krajaznaŭčaha muzieja dajuć mahčymaść raskryć ŭvieś vielizarny dyjapazon tvorčaści mastaka, adnačasova prasačyŭšy stylistyku i žanravuju strukturu žyvapisu Ju. Pena.

Najbolšuju ŭvahu na vystavie vyklikajuć piejzažnyja eciudy. Tempieramientnyja i sakavityja, jany padkreślivajuć majsterstva mastaka i raskryvajuć jašče adzin bok talentu Ju. M. Pena, viadomaha ŭ asnoŭnym dziakujučy kłasičnym partretam. I kali karciny bytavoha i partretnaha žanraŭ byli ŭ Pena pieravažna napoŭnienyja habrejskimi matyvami, dyk pejzažny žyvapis całkam biełaruski. Rysy adzinstva, ahulnaści, prysutničajuć va ŭsich piejzažach viciebskaj škoły. Heta — eskiznaść u maniery piśma, razmytyja, jak u šeruju hadzinu, kontury, pastelnaść u kałarycie i sakavityja, čystyja łakalnyja kalarovyja akcenty.

Krajavidy Viciebska i jaho vakolic paŭstajuć pierad nami nie tolki na rabotach znakamitaha mastaka, ale i na paštoŭkach pačatku XX stahodździa z fondaŭ Nacyjanalnaha histaryčnaha muzieja Respubliki Biełaruś.

Adras muzieja: vuł. Akademičnaja, 5 (za hałoŭnym korpusam NAN Biełarusi)

Teł. dla daviedak: 284 17 02

Kamientary da artykuła