Ni chrana! Minhandlu nie spadabałasia rekłama pradukcyi AVS (videa)

U Biełarusi prypynili tranślacyju rekłamy chrenu AVS.

U Biełarusi prypynili tranślacyju rekłamy chrenu AVS. Niekalki rolikaŭ, pryśviečanych chrenu, narabili šmat šumu i prymusili havaryć pra niepavahu da žančyny, pra seksizm u rekłamie i navat pra naviazvańni hiendernych stereatypaŭ.

Kali rekłama chrenu ABC vas viesialiła, i vy ździŭlajeciesia, kudy jana źnikła, paviedamlajem, što jaje raspaŭsiudžańnie zabaraniŭ Minhandal.

Sutnaść vysnovaŭ ekśpierta, jaki analizavaŭ roliki: rekłama maje jarka vyražany seksualny padtekst, vykarystoŭvajučy vobraz žančyny-pradaŭca. Rekłama chrenu, na dumku ekśpierta, moža być rascenienaja jak prychavanaja rekłama seksualnych pasłuh.

Psichołah Volha Andrejeva ŭ svaim ŽŽ źviarnuła ŭvahu na heta, jašče kali rekłamu na ŭsiu moc krucili pa televizary:

— Kali ščyra, ja nie dumała, što takoje mahčyma. U joj udzielničajuć dźvie starejučyja vulharna razmalavanyja ciotki. Adna ź ich pakupnik, a druhaja — pradaviec u sielmahu. Pakupnica prosić chren. Abiedźvie hladziać adna na adnu ź nieprytojenaj pahardaj. Pradaviec daje joj słoik chrenu i kaža: «Mužyka tabie treba!» I dadaje: «I mnie!».

— Słova «chren» niasie ŭ paŭsiadzionnaj movie mahutnuju seksualnuju nahruzku, čym ź nievierahodnaj kreatyŭnaściu skarystalisia aŭtary hetaha rekłamnaha rolika, — adznačaje Volha Andrejeva.

Dyrektar kamunikacyjnaha ahienctva EZERIN'COM Andrej Ezieryn ličyć, što stvaralniki rolika vykarystali aniekdatyčnuju situacyju — i tolki.

— Hetaja rekłama — na amatara. Mnie jana zdajecca paciešnaj. I toje, što jaje zabaranili, mianie ździŭlaje, jak i toje, što kandydat fiłasofskich navuk u svaim zaklučeńni piša, što rolik moža być rascenieny jak prychavanaja rekłama seksualnych pasłuh, — adznačaje ekśpiert. — Dla mianie rekłama chrenu AVS nie źjaŭlajecca čymści takim, što nielha pakazvać pa TB. Voś, naprykład, rekłama «mołodieckich» jajek u ludziej vyklikaje całkam kankretnyja asacyjacyi. I ničoha, nie zabaraniajuć.

Psichołah Raman Kručkoŭ adznačaje, što rekłama, z adnaho boku, pavinnaja čaplać i być u peŭnym sensie kreatyŭnaj i navat pravakacyjnaj, a z druhoha — nie skočvacca ŭ pošłaść.

— Jak spažyviec skažu, što hladzieć rekłamny rolik AVS mnie było niepryjemna. Sapraŭdy vulharna, — ličyć psichołah. — Pry hetym adznaču, što kab uhledzieć vyraznuju rekłamu seksualnych pasłuh u hetym roliku, treba pastaracca.

Kamientary da artykuła