Staličnaja milicyja vyjaviła ŭ Minsku falšyvuju budaŭničuju kampaniju
Pryvatnaja budaŭničaja kampanija try hady atrymlivała bujnyja staličnyja dziaržzamovy, vykarystoŭvajučy falšyvuju licenziju Ministerstva architektury i budaŭnictva.
Śledčym upraŭleńniem papiaredniaha rasśledavańnia HUUS Minharvykankama raspačataja kryminalnaja sprava, jakaja moža vylicca ŭ bujny skandał dla Ministerstva architektury i budaŭnictva i dla staličnaha kiraŭnictva.
U pole zroku pravaachoŭnych orhanaŭ trapiła budaŭničaja kampanija, jakaja ciaham troch hadoŭ atrymlivała bujnyja dziaržaŭnyja zamovy, vykarystoŭvajučy padrobleny śpiecyjalny dazvoł na prava ažyćciaŭleńnia dziejnaści «prajektavańnie i budaŭnictva budynkaŭ i zbudavańniaŭ 1 i 2 uzroŭniaŭ adkaznaści i praviadzieńnie inžyniernych pošukaŭ dla hetych metaŭ», nibyta vydadzienaje Ministerstvam architektury i budaŭnictva Biełarusi.
Kampanija vykonvała raboty dla UA «Biełaruski dziaržaŭny miedycynski ŭniviersitet», KUP «UKB Centralnaha rajona h. Minska», UP «Kinavideaprakat» i inšych arhanizacyj. Abjekty zdavalisia ŭ ekspłuatacyju, słužbovyja asoby dziaržarhanizacyj i kantralujučych struktur padpisvali akty i nichto navat nie padazravaŭ, što kampanija nie maje prava vieści budaŭničyja raboty. Jak takoje mahło adbycca, ciapier sprabujuć vyśvietlić śledčyja. Ale ŭžo ciapier zrazumieła, što biez nadziejnaha čynoŭnickaha prykryćcia tut naŭrad ci abyšłosia. Tym bolš što ŭsie raboty vykonvalisia za košt biudžetu Minska.
Pakul ža ŭ dačynieńni da dyrektara budaŭničaj kampanii raspačataja kryminalnaja sprava pa padazreńni ŭ ździajśnieńni złačynstva, praduhledžanaha č. 2 art. 233 (niezakonnaja pradprymalnickaja dziejnaść, spałučanaja z atrymańniem prybytku ŭ asabliva bujnym pamiery) Kryminalnaha kodeksa Biełarusi.
Pavodle dadzienych pravaachoŭnych orhanaŭ, u vyniku zaniatkaŭ bieźlicenzijnaj dziejnaściu dyrektar budaŭničaj kampanii atrymaŭ prybytak u pamiery 255 młn rubloŭ.
Cikava, što hetyja srodki byli ŭziatyja nie prosta sa staličnaha biudžetu, a z tych srodkaŭ, jakija nakiroŭvalisia na vykanańnie inviestycyjnaj prahramy i, značyć, jakija pavinnyja byli kantralavacca jašče bolš žorstka.Ź jakoj pryčyny i, hałoŭnaje, jak hetyja hrošy syšli naleva jašče, treba razabracca pravaachoŭnym orhanam.