Pucina aśvistali ŭ sportkompleksie «Alimpijski» — videa

Kanfuzam skončyłasia jaho sproba pavinšvać baksiora Jemialjanienku.

Prem'jer-ministra Uładzimira Pucina, jaki pryjechaŭ asabista pahladzieć na boj baksiora Fiodara Jemialjanienki, aśvistali ŭ žyvym efiry.

Paśla upeŭnienaj pieramohi Fiodara nad amierykancam Džefam Monsanom Pucin vyjšaŭ na rynh asabista pavinšavać rasiejskaha hihanta z doŭhačakanaj pieramohaj, adnak jaho niadoŭhi vystup byŭ sustrety hudam i śvistam z trybun, asabliva spačatku, pakul jon nie pieravioŭ fokus na Jemialjanienku, pieradaje Newsru.com.

«Darahija siabry, siońnia va ŭsich amataraŭ bajavych mastactvaŭ, amataraŭ bajoŭ biez praviłaŭ vialikaje śviata. I hetaje śviata adbyłosia, dziakujučy mužnym, adkrytym sapraŭdnym mužčynam, jakija pryjechali z šaści krain. Vielmi im dziakujem. I my ŭsie ad dušy vinšujem Fiodara Jemialjanienku, sapraŭdnaha rasiejskaha vołata. I nie tolki tamu, što jon dužy. Nie tolki tamu, što ŭ jaho vydatnyja muskuły i reakcyja, a za jaho charaktar. ​​Jon rasiejski vołat. Vinšuju ciabie, Fiedzia», — skazaŭ premjer.

Zusim inakš trybuny vitali samoha pieramožcu, kali Pucin pieradaŭ jamu mikrafon. «Vielmi vam dziakuju. Dziakuj Bohu za hetuju pieramohu. Mocna vam dziakuj, dziakuj vam za padtrymku, za vašyja malitvy, za ŭsio. Za vašu luboŭ», — skazaŭ Jemialjanienka. Paśla kožnaj frazy jon pieraryvaŭsia, słuchajučy šum trybun, jakija pasiaredzinie pramovy prynialisia skandavać jaho imia.

Charakterna, što pry paŭtory kadraŭ ź vinšavańniami ad premjera na kanale «Rasija-2» nakłali inšy interšum (fonavy huk trybun), i niehatyŭnych prajavaŭ na adras Pucina ŭžo nie čuvać.

Akramia Pucina, na viečar bajoŭ u «Alimpijski» pryjechała mnostva VIP-haściej: siarod ich byli mer Maskvy Siarhiej Sabianin, čempijonka śvietu pa boksie siarod prafiesijanałaŭ Natalla Rahozina (jana siadzieła pobač z Pucinym), lidear kamandy «Rasiejskija vołaty» Alaksandr Muramski, tenisist Marat Safin i himnast Alaksiej Niemaŭ. Taksama na turniry prysutničaŭ ministr sportu, turyzmu i maładziožnaj palityki Rasii Vital Mutko. Usiaho «Alimpijski» sabraŭ 22 tysiačy hledačoŭ.

Pahladzieŭšy boj, Pucin pryjechaŭ da patryjarcha Kiryłu i pavinšavaŭ taho ź jubilejem, uručyŭšy bukiet biełych ružaŭ, paviedamlaje RIA «Naviny». Pradstajaciel RPC padziakavaŭ kiraŭniku ŭrada. «Nakolki ja viedaju, vy prybyli z dobrymi viestkami», — skazaŭ jon. Pucin raspavioŭ ab pieramozie Jemialjanienki, i patryjarch dałučyŭsia da jaho vinšavańniaŭ: «Ja daŭno viedaju Fiodara i, viadoma, jaho vinšuju».

Kamientary da artykuła