Što takoje ekranavańnie, eluminavańnie i kaŭteryzacyja?
abo Što ŭ Minsku možna zrabić sa svaimi vałasami.
Zdarovyja i pryhožyja vałasy — mara kožnaj žančyny. Hetym karystajucca vytvorcy kaśmietyčnaj pradukcyi, pastaŭlajučy na rynak novyja tavary i pasłuhi pa dohladu za vałasami.
Za apošnija hady pieralik pasłuh biełaruskich cyrulniaŭ i sałonaŭ pryhažości značna pašyryŭsia. My vyrašyli vyśvietlić, dla čaho pryznačanaja taja ci inšaja pracedura. Razabracca ŭ hetym dapamahaŭ stylist, kiraŭnik Doma pryhažości «Muson» Alaksandr Kiryniuk.
Termastryžka, albo stryžka haračymi nažnicami, daje efiekt zapajvańnia vołasa. Heta abaraniaje jaho ad škodnaha vonkavaha ŭździejańnia i zachoŭvaje ŭnutry ŭsie kaštoŭnyja rečyvy. Pry tradycyjnaj stryžcy končyki vałasoŭ zastajucca «adčynienymi», što pryvodzić da krochkaści, «pasiečanaści».
Pry termastryžcy režučaja častka nažnic nahravajecca ad elektratoku da patrebnaj tempieratury (80—180ieS u zaležnaści ad typu vałasoŭ). Zatym majstar stryže, jak zvyčajna. Možacie nie chvalavacca za svaju biaśpieku: pavierchnia nažnic pakrytaja achoŭnym korpusam z płastyku, što abaraniaje hałavu ad ciepłavoha ŭździejańnia.
Vykonvać takuju praceduru śpiecyjalisty rajać raz na 1-2 miesiacy. U pieršuju čarhu — ŭładalnicam śvietłych vałasoŭ, a taksama, kali vašy vałasy tonkija.
Košt — kala 150 000 rubloŭ
Siarod pasłuh cyrulnych sałonaŭ jość hłazuravańnie, łaminavańnie, eluminavańnie i ekranavańnie. Usio heta — pracedury źbierahalnaha biezamijačnaha farbavańnia, taniravańnia vałasoŭ sa stvareńniem achoŭnaj plonki, jakaja nadaje dadatkovaje źziańnie.
Samaj niedarahoj praceduraj hrupy źjaŭlajecca hłazuravańnie — pakryćcio vałasoŭ płastam «hłazury» z kieramidami. Heta daje dadatkovy blask, što asabliva zaŭvažna na porystych i paškodžanych vałasach. Hłazurnaja plonka zmyvajecca za paru tydniaŭ.
Košt — kala 300 000 rubloŭ.
Kali vy chočacie, kab vašyja vałasy nie tolki źziali, ale i pavialičylisia ŭ abjomie, možacie pasprabavać łaminavańnie. Na vałasy na paŭhadziny nanosicca śpiecyjalny rastvor z karysnymi rečyvami, jaki achinaje vałasinki i «zalaplaje» pasiečanyja končyki. Zatym «łaminat» zmyvajuć. U vyniku vałasy atrymlivajuć dadatkovaje źziańnie i abjom. Taki efiekt doŭžycca ad 3 da 6 tydniaŭ, pastupova zmyvajučysia. Biełaruski najčaściej robiać łaminavańnie napiaredadni važnaj žyćciovaj padziei: vypusknoha ci viasiella.
Košt (u zaležnaści ad daŭžyni vałasoŭ) — 400 000 -- 1 000 000 rubloŭ.
Ekranavańnie — heta dohlad za vałasami, jaki zabiaśpiečvaje achovu ad uździejańnia navakolnaha asiarodździa, siłkavańnie i ŭvilhatnieńnie. Pa mierkavańni niekatorych śpiecyjalistaŭ, ekranavańnie lečyć unutranuju strukturu vałasoŭ, a łaminavańnie — vonkavuju.
Košt — kala 400 000 rubloŭ.
Kali łaminavańnie zrobić vašyja vałasy bliskučymi, nie źmianiajučy ich koler, to eluminavańnie — heta farbavańnie vałasoŭ śpiecyjalnym rečyvam — elumienam. Eluminavańnie nazyvajuć jašče ionnym farbavańniem, vołas zaradžany stanoŭča, a farbavalnik — admoŭna. U vyniku koler trymajecca daŭžej, a vałasy robiacca bolš zdarovymi, bo farbavańnie elumienam nie vymahaje akiślalnika. Pa ŭździejańni na vałasy elumien paraŭnoŭvajuć z chnoj.
Elumien nanosiać na suchija i čystyja vałasy z dapamohaj śpiecyjalnaj nasadki i vytrymlivajuć 20—30 chvilin. Nasadka nieabchodnaja, kab farbavalnik nie patrapiŭ na skuru hałavy. Trymajecca elumien 3-4 tydni.
Košt (u zaležnaści ad daŭžyni vałasoŭ) — 400 000 -- 1 000 000 rubloŭ.
Kaŭteryzacyja — heta lačebnaja pracedura, jakaja siłkuje i paśladoŭna ŭznaŭlaje paškodžany vołas: ad unutranaj častki da pavierchni. Byvaje chałodnaja i haračaja kaŭteryzacyja. Apošniaja vykarystoŭvajecca, kali vałasy nadzvyčaj paškodžanyja. Pracedura ŭklučaje niekalki etapaŭ: 1. Myćcio hałavy śpiecyjalnym šampuniem. 2. Na vilhotnyja vałasy nanosiać kaŭteryzacyjnuju syvaratku, paśla čaho ich sušać fienam i pravodziać parykmachierskim prasam. Ciepłynia nieabchodnaja, kab usie karysnyja rečyvy patrapili ŭ vołas. 3. Zatym — jašče adno myćcio hałavy i naniasieńnie kompleksu śpiecyjalnyj srodkaŭ.
Pry chałodnaj kaŭteryzacyi paśladoŭnaść dziejańniaŭ takaja ž, ale biez vykarystańnia prasa. Kurs lačeńnia ŭklučaje čatyry pracedury ŭ miesiac.
Košt — kala 300 000 rubloŭ.