200 minčukoŭ pratestujuć suprać budaŭnictva dvuch damoŭ dla śpiecnazaŭcaŭ
+ mapa mierkavanaj budoŭli
Haradskija ŭłady chočuć uščylnić zabudovu Uručča i dadać jašče dva šmatpaviarchoviki.
Žychary minskaha mikrarajona Uručča-2 čarhovy raz nakiravali zvarot u administracyju Pieršamajskaha rajona z patrabavańniem nie budavać na zialonaj zonie dva damy dla supracoŭnikaŭ śpiecnaza. Takoje rašeńnie pryniata na schodzie žycharoŭ.
Haradskija ŭłady płanujuć zabudavać terytoryju skviera, jaki znachodzicca na skryžavańni vulic Šuhajeva i Rusijanava, jašče z 2005 hoda. Na ŭsich raniejšych hramadskich abmierkavańniach ludzi adnaznačna zajaŭlali pra niazhodu z płanami budaŭnictva šmatpaviarchovych damoŭ na miescy zialonaj zony, uščylnuju da isnaj žyłoj zabudovy i nakiroŭvali listy-skarhi ŭ roznyja instancyi.
Płanujecca, što dva žyłyja šmatpaviarchoviki buduć pabudavany dla supracoŭnikaŭ pałka milicyi admysłovaha pryznačeńnia (śpiecnaza), jakim patrebna palepšyć svaje žyllovyja umovy. Darečy, śpiecnazaŭcy zmohuć atrymać ilhotny kredyt pad 5% hadavych.
Vynikam čarhovaha zboru staŭ kalektyŭny zvarot hramadzian u administracyju Pieršamajskaha rajona Mienska, pad jakim padpisalisia ŭsie prysutnyja na zbory (kala 200 čałaviek).
Udzielniki zboru nahadali ŭładam, što ščylnaść nasielnictva ŭ mikrarajonie ŭžo ciapier u razy pieravyšaje narmatyvy i dasiahaje 766 čał/ha; a ščylnaść žyllovaha fondu — 14,048 kv. m/ha. U hienpłanie rajon paznačany jak «rajon z zališnie vysokaj intensiŭnaściu šmatkvaternaj zabudovy».