Kolki kaštuje abied u zvyčajnych stałovych
Ci tańniej, čym u stałoŭcy Nacbanka?
Naprykancy studzienia ŭ presu trapiła mieniu viedamasnaj stałoŭki Nacbanka. Vyśvietliłasia, što tut možna niabłaha padjeści pa vielmi demakratyčnych koštach. Paŭnavartasny abied, jaki składajecca z supu, rybnaj katlety z harniram, sałaty sa śviežaj harodniny i čaju abo soku z bułačkaj, kaštuje tut kala 15 tysiač rubloŭ. Adnak paabiedać u hetaj stałoŭcy mohuć tolki supracoŭniki banka. Dla «prostych śmiarotnych» my prapanujem nievialiki ahlad varyjantaŭ paabiedać u stalicy.
Kaviarni i bistro
Hetyja ŭstanovy prapanujuć kompleksnyja abiedy abo stravy abiedziennaha mieniu. U siarednim pajeści ŭ bistro na siońnia kaštuje 30–40 tysiač. Pieršyja stravy tut padajuć za 10–15 tys., sałaty kaštujuć ad 3 tys. (z čyrvonych burakoŭ z časnakom, naprykład) da 15 tys. (asarci sa śviežaj harodniny). Na druhoje možna zamović katlety — śvinyja, ź jałavičyny i ptuški kaštujuć kala 10 tys. za 100 hram. Zapiečanaje miasa kaštuje ad 22–23 tys. za 200–250 hramaŭ. Na harnir možna zamović kašu — hreckuju ci rysavuju — kala 2 tys. rubloŭ za 100 h. Ci bulbianoje piure — kala 2,5 tys. za 150 h. Sok ci mors kaštuje kala 5 tys. rubloŭ.
Stałoŭki
Časam u stałoŭkach daloka nie horšy asartymient i jakaść stravaŭ, čym u bistro. I roźnica ŭ cenach tłumačycca chutčej statusam i ŭnutranym azdableńniem ustanovy. Kali vy nie hatovyja abo nie ličycie patrebnym płacić za pryhažejšyja špalery i daražejšy abrus na stale, to vam u stałoŭku. Tym bolš što siońnia nie prablema patrapić u bolšaść viedamasnych stałovak. Navat u školnyja, jakija častku abiedaŭ pradajuć starońnim naviednikam. U siarednim, u minskich stałoŭkach možna paŭnavartasna paabiedać za 15–20 tysiač.
Kulinaryi
Jašče adzin varyjant — kulinarnyja adździeły ŭ vialikich kramach. Tut možna nabyć na vahu sałaty, miasnyja stravy i harniry. Adziny minus — adsutnaść supoŭ. U astatnim možna skłaści sabie abiedziennaje mieniu nie horšaje, čym u stałoŭcy, — i pa canie, i pa jakaści. Jak praviła, kulinaryi prapanujuć sałaty na vybar — ad samych tannych (buraki, kisłaja kapusta) da darahich (ad 5 tysiač za 100 hram). Ježu mohuć pahreć na miescy — zručny varyjant dla tych, chto pracuje pobač.
Abiedy na dom
Mnohija kafe i bistro prapanujuć pasłuhi dastaŭki abiedaŭ na ofis. Taki abied kaštuje ŭ siarednim na 5–6 tysiač daražej, čym kompleksny na miescy. Stravy pryvoziać u adnarazovym posudzie, što vyrašaje pytańnie zachoŭvańnia piersanalnaha posudu na pracy.
Svaje pasłuhi pa dastaŭcy abiedaŭ prapanujuć i pryvatnyja pradprymalniki. Mnohija ź ich prymajuć papiarednija zamovy na kankretnyja stravy. Taki abied moža składacca z porcyi supu (5–6 tysiač za 0,5 ł) i druhoj stravy — naprykład, katleta z bulbaj i nievialikaj porcyjaj sałaty z kapusty (12–13 tysiač).