Piefcijeŭ buduje sabie pad Minskam vielizarny dom
Styl — typovy dla sučasnaj bałtyjskaj architektury.
Adzin z samych zamožnych ludziej Biełarusi — biznesoviec Uładzimir Piefcijeŭ — na ŭskrajku vioski Raŭbičy pad Minskam buduje dom u styli chaj-tek. Pakul nadvorje nie spryjaje daviadzieńniu da ładu vonkavaj «karobki», hmach azdablajuć usiaredzinie.
Dom Uładzimira Piefcijeva ŭ Raŭbičach pad Mienskam. Za šklanoj ścianoj – basiejn.
Vyhlad z tyłu: vialikaja terytoryja jašče nie asvojenaja.
Architekturnyja impravizacyi: madernovy dom i kłasičnaje šale.
Užo na padjeździe da vialikaha abjektu, vitražy jakoha prahladajucca skroź redki lasok, zaŭvažna, što budoŭli prysvojeny premium-kłas.
A 10-j ranicy da placoŭki pačynajuć padciahvacca šmatlikija kantralory ź ministerskaha vyhladu tečkami. Jany supastaŭlajuć zroblenaje z namalavanym na papiery.Kali da niadaŭniaha času płaniorki ładzilisia dvojčy na tydzień, to ciapier inśpiekcyi praktyčna štodnia.
Pryjomkaj zajmajecca najpierš architektar, vypisanaja z Łatvii, ale siady-tady zaziraje na placoŭku i sam haspadar — Uładzimir Piefcijeŭ.
Ujezd na ŭčastak — praz šłahbaŭm, dom Piefcijeva adrazu za im.
Dalej pa vulicy niekalki katedžaŭ, jakija vyhladajuć zusim ścipła ŭ cieni kankurenta. Dziasiatak domikaŭ budaŭnikoŭ śviedčyć, što pracy viaducca nie ŭ adnu źmienu.Maštaby, dziela spraviadlivaści, dajuć padstavu zasumniavacca: mahčyma, na ŭskrajku lesu ŭzvodzicca viedamasny sanatoryj ci jašče adzin korpus buduje Nacyjanalny bank — litaralna pa susiedstvie mieścicca navučalny centr hetaj finansavaj ustanovy.
Budaŭniki choć i atrymali instrukcyi nie ŭstupać u razmovy ź nieznajomymi ludźmi, ale iluzii raśsiejvajuć: «Nu tak, heta jon sabie buduje dom... Ciažka skazać, kolki tut kankretna kvadratnych mietraŭ, ale navat nie tysiača, mabyć, dźvie tysiačy jak minimum. Bo tut ža nie tolki žyłyja pamiaškańni, ale i basiejn, i nižnija pavierchi haspadarčyja. Usio pradumana...»
Na budoŭli zadziejničanyja niekalki bryhadaŭ, jakim akreśleny kankretny front dziejnaści.
Značnyja siły kinutyja na mantaž abstalavańnia basiejna. Jon schavany za vializnaj šklanoj ścianoj, jakuju miarkujecca azdobić vitražami.Čarnavyja pracy na jašče nie zavieršanym abjekcie śpiecyjalisty aceńvajuć nie mieniej jak u 4 miljony dalaraŭ. Možna tolki zdahadvacca, va što vyljecca kančatkovy pradukt, bo jašče pustuje aharodžanaja terytoryja, na jakoj, miarkujučy pa ŭsim, taksama buduć uzvodzicca spadarožnyja abjekty.
Pakul tam pa-sirocku staić pabudova z draŭlanaha brusu, nakrytaja tryśniahom, funkcyjanalna padobnaja da haściavoha damka ci łaźni.
Ale naŭrad ci vyrašeńnie žyllovaha pytańnia padarvie dabrabyt Uładzimira Piefcijeva. Užo niekalki hadoŭ zapar hety nabližany da ŭłady 55-hadovy aliharch uznačalvaje rejtynh 200 samych paśpiachovych i ŭpłyvovych biznesoŭcaŭ Biełarusi, jaki składajecca internet-partałam «Ježiednievnik».
Jahonyja aktyvy i asabistyja źbieražeńni aceńvajucca ŭ 1 miljard dalaraŭ.
Paśla letašniaha aryštu jašče adnaho pradstaŭnika V.I.P.-śpisu — bankira Viktara Šaŭcova — źjavilisia čutki, što Uładzimir Piefcijeŭ nie staŭ čakać raźvićcia padziejaŭ i źjechaŭ u Abjadnanyja Arabskija Emiraty, dzie zarehistravanaja jahonaja firma «BelTechExport FZE». Adnak paśla hetaha Piefcijeŭ nie raz źjaŭlaŭsia na publičnych mierapryjemstvach, a rašeńnie zajmieć majomaść, adpaviednuju statusu, śviedčyć, što adjezd ź Biełarusi ŭ jahonyja bližejšyja plany nie ŭvachodzić. Havoryć adzin sa składalnikaŭ rejtynhu Vadzim Siachovič:
«Biezumoŭna, kali dom buduje, to, napeŭna, niejki kamfortny kutok sabie šukaje. Praŭda, hetych kutkoŭ u jaho, nakolki možna mierkavać pa presie, dosyć šmat, i jašče nie fakt, što jon tut budzie žyć. Bo šmat jość takich prykładaŭ, kali čałaviek maje ŭ Biełarusi nieruchomaść, ale nie žyvie tut. Heta tyčycca nie tolki biznesoŭcaŭ, ale i inšych katehoryj — tyja ž maskvičy sabie ŭ vialikaj kolkaści kuplajuć u Minsku nieruchomaść. U lubym vypadku nieruchomaść i ŭ Minsku, i pad Minskam pastajanna raście ŭ canie, i heta taksama niejkaje inviestavańnie kapitału.
A Piefcijeŭ — heta toj čałaviek, jaki ŭmieje inviestavać kapitał».
Zachodnija ŚMI naŭprost nazyvajuć Piefcijeva «kašalkom Łukašenki». U červieni minułaha hoda jon pieršy ź biełaruskich biznesoŭcaŭ trapiŭ pad jeŭrapiejskija sankcyi: ujezd u ES jamu zabaranili, a aktyvy troch padkantrolnych jamu kampanij — «Bełtechkespart», «BT Telekamunikacyi» i «Sport Pary» — zamarozili. U «čornym śpisie» Piefcijeŭ fihuruje jak «hałoŭny ekanamičny daradca Łukašenki» i «klučavy sponsar režymu». Litaralna praź niekalki dzion paśla ŭniasieńnia Piefcijeva ŭ «čorny śpis» Łukašenka zajaviŭ, što inicyjatary padobnaha rašeńnia — «niahodniki i padonki».
Pa acenkach analitykaŭ, asnoŭny kapitał Uładzimir Piefcijeŭ atrymaŭ dziakujučy zbrojnym kantraktam. Jahonaja kampanija «Biełtechekspart» — manapolny apieratar u źniešnich pastaŭkach vajennaj i śpiecyjalnaj techniki, inviestycyjny ahient uradu Biełarusi ŭ halinie vajenna-pramysłovaha kompleksu. Filii «Biełtechekspartu» pracujuć u Indyi i Abjadnanych Arabskich Emiratach. Ź ciaham času Piefcijeŭ istotna pašyryŭ miežy svajho biznesu i ciapier kuryruje šyroki dziełavy śpiektr.
- «BT Telekamunikacyi». Raniej — kampanija-kiraŭnik aktyvaŭ MŁS «Velcom», ciapierašniaja śfiera dziejnaści — inavacyi, budaŭnictva, finansavy lizinh.
Akcyjanier bankaŭskich ustanoŭ — «Biełźniešekanombanka» i «Pryjorbanka».
Aktyvy ŭ SP «Dziełavaja sietka» (interniet-pravajdar).
Hulniavy biznes: apieratar łatarei «Sport-pary».
Vytvorčaść likiora-harełačnych napojaŭ: Malinaŭščyźnienski śpirta-harełačny zavod «Akvadziŭ».
Inviestar u Aršanski avijaramontny zavod.
Partnior kampanii «Katar Pietroleum» u budoŭli zavodu kompleksnych uhnajeńniaŭ u Katary.
Inviestycyjny ahient pa praviadzieńni chakiejnaha čempijanatu śvietu-2014.
Staršynia hramadskaha abjadnańnia «Biełaruskaja tenisnaja federacyja», siabra Nacyjanalnaha alimpijskaha kamiteta Biełarusi.