U Mahilovie asudžany bujny čynoŭnik harvykankama

Były namieśnik staršyni Mahiloŭskaha harvykankama pryhavorany da troch hadoŭ pazbaŭleńnia voli.

Jak paviedamlaje pres-hrupa ŭpraŭleńnia KDB pa Mahiloŭskaj vobłaści, supracoŭnikami UKDB byli vyjaŭleny fakty vykarystańnia słužbovaha stanovišča ŭ karyślivych metach byłym namieśnikam staršyni harvykankama. Kuryrujučy ŭ adpaviednaści sa słužbovymi abaviazkami pracu budaŭničaj haliny horada, čynoŭnik vyrašyŭ minimizavać zatraty na budaŭnictva ŭłasnaha pryvatnaha doma. Pa «dapamohu» jon źviarnuŭsia da dyrektara budaŭničaj arhanizacyi z prośbaj vydzielić śpiecyjalnuju techniku, hruzavy aŭtatranspart, budaŭničyja materyjały i rabočych budaŭničych śpiecyjalnaściaŭ biez zaklučeńnia adpaviednych dahavoraŭ i apłaty.

Niahledziačy na niepravamierny charaktar prośby słužbovaj asoby, dyrektar pradpryjemstva arhanizavaŭ z kastryčnika 2007 hoda pa kastryčnik 2009 hoda vytvorčaść rabot, źviazanych z budaŭnictvam pryvatnaha doma.

U adpaviednaści z č. 2 art. 426 «Pieravyšeńnie ŭłady abo słužbovych paŭnamoctvaŭ» i č. 2 art. 210 «Kradziež šlacham złoŭžyvańnia słužbovymi paŭnamoctvami» Kryminalnaha kodeksa Biełarusi sud Leninskaha rajona Mahilova vynies byłomu čynoŭniku pakarańnie ŭ vyhladzie pazbaŭleńnia voli terminam na 3 hady z kanfiskacyjaj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych abaviazkaŭ. Dyrektaru budaŭničaj arhanizacyi sud vynies anałahičny pryhavor z adterminoŭkaj jaho vykanańnia na 2 hady.

Abvinavačanyja padali kasacyjnyja skarhi ŭ abłasny sud, paviedamlaje pres-hrupa UKDB pa Mahiloŭskaj vobłaści.

Kamientary da artykuła