Sudy pa skarhach «nievyjaznych» pravaabaroncaŭ adbuducca 16 lipienia
Aleh Hułak i Valancin Stefanovič čakali razhladu skarhi čatyry miesiacy.
Sudy pa skarhach kiraŭnika pravaabarončaj arhanizacyi «Biełaruski Chielsinkski kamitet» (BCHK) Aleha Hułaka i pravaabaroncy Valancina Stefanoviča na ŭklučeńnie ich u bazu nievyjaznych ź Biełarusi projduć 16 lipienia. Pra heta paviedamiŭ Stefanovič.
Pavodle jaho słoŭ,
razhlad skarhaŭ adbudziecca ŭ sudzie Centralnaha rajona Minska. «Razhladać skarhi i maju, i Hułaka budzie sudździa Alena Siemak. Joj spatrebiłasia amal čatyry miesiacy, kab pryznačyć datu razhladu. Zhodna z zakanadaŭstvam, takija spravy pavinny być razhledžany na praciahu miesiaca», — adznačyŭ pravaabaronca.
Razbor pa skarzie Hułaka pryznačany na 11.00, Stefanoviča — na 14.30.
Nahadajem, 13 sakavika Hułaku była vydadziena daviedka ab tym, što z 5 sakavika jamu zabaronieny vyjezd ź Biełarusi. Z dakumienta vynikała, što Hułaku vystaŭleny hramadzianski isk u sudzie. Adnak pra taki isk pravaabaronca ničoha nie viedaŭ, nivodzin sud nie infarmavaŭ jaho ab uniasieńni ŭ «śpisy nievyjaznych».
11 sakavika pry pierasiačeńni dziaržaŭnaj miažy ŭ pahraničnym pierachodzie «Kamienny Łoh» Stefanoviču było admoŭlena ŭ pravie vyjezdu z krainy. 13 červienia Stefanovič atrymaŭ list ad načalnika departamienta pa hramadzianstvie i mihracyi MUS Alaksieja Biehuna, u jakim havaryłasia, što pravaabaronca byŭ uklučany ŭ bazu nievyjaznych
Varta adznačyć, što
22 červienia kiraŭnik jurydyčnaj słužby BCHK Hary Pahaniajła damohsia ŭ sudzie Maskoŭskaha rajona vyklučeńnia jaho sa śpisu asob, vyjezd jakim za miažu časova abmiežavany.