KDB šukaje ahienta-samazvanca?

Kamitet dziaržaŭnaj biaśpieki praviaraje, ci sapraŭdy da mahiloŭskaha aktyvista niaŭradavaj arhanizacyi «Hramadzianski forum» Uładzisłava Jarašova prychodziŭ čałaviek, jaki nazvaŭsia supracoŭnikam KDB. Zaniepakoj śpiecsłužby vyklikali publikacyi na hetu temu.

Publikacyi ŭ niezaležnych internet-vydańniach pra vizit da Uładzisłava Jarašova supracoŭnika KDB źjavilisia 15 žniŭnia. Jak śćviardžałasia, da aktyvista pryjšoŭ małady čałaviek, jaki nazvaŭsia kadebistam. Jon raspytvaŭ pra finansavańnie i arhanizacyju pracy ŭ vybarčaj kamandzie niezaležnaha vyłučenca na deputactva Uładzimira Punčanki, u padtrymku jakoha Jarašoŭ źbiraŭ podpisy. Paźniej, paśla źjaŭleńnia publikacyjaŭ, aktyvista dapytali ŭ mahiloŭskim KDB. Pra dopyt i vizit «kamitetčyka» aktyvist kazać ciapier ustrymlivajecca:

«Ja nie chacieŭ by ahałošvać usio heta. Dla mianie heta ciapier budzie prablematyčna. Ja jašče daŭ zabaviazańnie nie razhałošvać ničoha — nie davać niepravieranuju infarmacyju».

Ad mahiloŭskich pravaabaroncaŭ viadoma, što padčas dopytu kamitetčyki vyśviatlali ŭ Jarašova, chto ž da jaho prychodziŭ. Pravaabaronca Alaksiej Kołčyn zajaŭlaje:

«Ščyra kažučy, ja nie mahu pavieryć, kab niechta navažyŭsia, prykryvajučysia šyldaj KDB, u niejkaha aktyvista pra niešta vypytvać. Tut samim śpiecsłužbistam lepš pavinna być bačna, dzie im razabracca i nie rabić z hetaha teatra. U tym sensie — čamu my pra heta napisali. Chaj šukajuć taho čałavieka, jaki prychodziŭ. Jon ža telefanavaŭ, damaŭlaŭsia. Heta ž usio niaciažka vyśvietlić».

Kamientary da artykuła