Kancert Lavona Volskaha ŭ «Art-Siadzibie» admienieny, budynak apiačatany

Siońniašni kancert Lavona Volskaha, jaki mieŭsia adbycca ŭ Minsku ŭ novym pamiaškańni tvorčaj placoŭki «Art-Siadziba» (pr-t Puškina, 28a), pieraniesieny ŭ siadzibu BNF (vuł. Čarnyšeŭskaha, 3). Pačatak a 18.30. U kancercie taksama biare ŭdzieł saksafanist i flejtyst Pavał Arakielan.

Siońnia miełasia adbycca adkryćcio novaha pamiaškańnia «Art-Siadziby» (Puškina 28a). Pieršym kancertam musiŭ być akustyčny vystup Lavona Volskaha. Adnak učora ŭviečary art-dyrektar«Art-Siadziby» Pavał Biełavus pryjechaŭ u novaje pamiaškańnie i daviedaŭsia, što MNS apiačatała budynak.

«My ŭčora rabili hienieralnuju pryborku. — raskazvaje Biełavus. — A 18-j hadzinie ja viarnuŭsia na „Siadzibu“, i ŭbačyŭ, što dźviery apiačatanyja, a pobač visić papierka z proźviščami dvuch śviedkaŭ. Vyjaviłasia, što, pakul nas nie było, MNS nas začyniła. Ułaśnik pamiaškańnia paśla raskazaŭ, što jak tolki ŭ internecie źjaviłasia infarmacyja pra našaje adkryćcio, jaho vyklikali ŭ ministerstva, litaralna padniali z łožka. Skłali papieru. My, kaniečnie, možam adkrycca, ale spačatku da nas pryjedzie MNS, paśla sanstancyja, paśla jašče chto-niebudź.

Bolej za paru miesiacaŭ my ŭsio adno nie pratrymalisia b, tamu skasavali damovu».

Ci «Siadzibu» zakryli praź jaje minułaje, ci pryčyna ŭ kancercie Volskaha — dyrekcyja «Siadziby» adkazać nie moža.

«Reč u tym, što Frunzienski rajon vielmi kansiervatyŭny. — razvažaje Pavał Biełavus. — Nam ułaśnik siońnia skazaŭ, što lepiej šukać pamiaškańnie ŭ inšym rajonie: administracyja Frunzienskaha vielmi ŭsiaho baicca. Voś jany nas ubačyli, pačuli pra Volskaha».

Adnak «Art-Siadziba» tak ci inakš budzie adnoŭlena.

«U nas zaraz jość dla taho srodki, mahčymaści, ludzi. — kaža Biełavus. — Vidać, budziem šukać pamiaškańnie, jakoje naležyć fizična asobie, kab hety čałaviek nie bajaŭsia puścić nas da siabie. Ci budziem šukać pamiaškańnie, jakoje naležyć zamiežnikam, ci pasprabujem damaŭlacca z ambasadami».

Kamientary da artykuła