Šuškievič: Paźniak — palityčny deziercir

2.11.2012 / 12:43

Vykazvańni Zianona Paźniaka kamientuje staršynia Viarchoŭnaha Savieta Biełarusi 12 sklikańnia Stanisłaŭ Šuškievič.

«Zianon nie znachodzić sabie miesca ciapier. Jon nie patrebny ni Zachadu, ni Biełarusi. I tamu jon musić rabić niejkija zajavy, kab na jaho znoŭ źviarnuli ŭvahu.

Ja maju vialiki sumnieŭ nakont taho, što ŭ Paźniaka jość krynicy ŭ KDB, jakija dajuć jamu takuju infarmacyju. A kali jaho tak abłapošvaje KDB, to vielmi škada, što Zianon Stanisłavavič staŭ takim abmiežavanym čałaviekam.

Jon nia viedaje, što adbyvajecca ŭ Biełarusi. Jamu heta ciažka ŭjavić. Ja kali źjaždžaju ź Biełarusi na tydzień-dva, i to drenna aryjentujusia, što ŭ nas tut adbyvajecca. A Zianon užo hetulki hadoŭ siadzić pa-za Biełaruśsiu.

A hetyja źviony, jakija źviazvajuć jaho ź Biełaruśsiu, KCHP-BNF, heta — usie fanaty. Jany na jaho molacca i bolš ničoha nia viedajuć. Tamu ja nie źviartaŭ by surjoznaj uvahi na jahonaje hetaje interviju.

Ja dobra viedaju, što ŭ nas jość i pradažnyja palityki, i tyja, chto žyvie za košt Zachadu. Ale balšynia tych, chto supraćstajać režymu, heta vielmi prystojnyja i dastojnyja ludzi. I pryšyvać im takoje nielha.

Ja chaču skazać, što naahuł Zianon Stanisłavavič źjaŭlajecca palityčnym dezerteram. Jon źbieh ź Biełarusi. Jon — truślivy. Jon baicca.

I kali kazać ščyra, stratehičnaja pamyłka była im zroblena, kali jon byŭ deputatam Viarchoŭnaha Savietu 12 sklikańnia. Nie ŭśviedamlajučy hetaha, jon zrabiŭ usio, kab zahubić BNF. Jon ščyra dumaŭ, što robić dobruju spravu. Ale što adbyłosia? Zianon i jaho kalehi patrabavali, kab ja ŭźniaŭ pytańnie ab samarospusku Viarchoŭnaha Savietu. Jany byli pierakananyja, što na nastupnych vybarach abiaruć mnoha svaich deputataŭ.

Adnak paśla adbylisia vybary Viarchoŭnaha Savietu 13 sklikańnia. I nivodzin, zaŭvažcie, nivodzin pradstaŭnik BNF na demakratyčnych vybarach nia byŭ abrany. Tamu što toj radykalizm, jaki pior ź Zianona Stanisłavaviča, byŭ niezrazumieły ludziam.

Tolki nievialikaja žmieńka, pa-sapraŭdnamu, pa-biełarusku aryjentavanaja, mahła jaho padtrymać. Jon apieradžaŭ našu dumku, biełaruskuju mentalnaść.

Spačatku Paźniak dobra dziejničaŭ, utvaryŭšy BNF, raskryŭšy Kurapaty. A paśla jaho dziejnaść skončyłasia. Ale jon uvieravaŭ, što jon — prarok.

I ciapier viaščaje. Viaščaje na kožnym skryžavańni, što ŭsie — ahidnyja. Akramia jaho samoha.

Ale jon — palityčny dezerter, jaki schavaŭsia ŭ naru. Heta Zianon Stanisłavavič žyvie za zamiežnyja hrošy, jak čałaviek, jaki atrymaŭ palityčny prytułak. Jon viadzie askietyčnaje isnavańnie. I heta praŭda. Jon — česny čałaviek. Heta — jahonyja dumki. Ale jany pamyłkovyja. Što tut zrobiš?!»

Čytajcie taksama:

Kamientary da artykuła