Uładzimier Ryžkoŭ: To dziŭnyja vybary
Deputat Dziaržaŭnaj dumy Rasii Uładzimir Ryžkoŭ nazvaŭ «dziŭnym» pryncyp daterminovaha hałasavańnia ŭ chodzie prezidenckich vybaraŭ u Biełarusi.
U intervju BiełaPAN palityk paviedamiŭ, što paśla prybyćcia siońnia ŭ Minsk jon užo naviedaŭ niekalki vybarčych učastkaŭ. «Ja nie pomniu nivodnaj krainy śvietu, dzie b u daterminovym hałasavańni ŭdzielničali ad 25 da 30% vybarščykaŭ, a ŭ sielskaj miascovaści - ad 50 da 60% hramadzian. Mnie kazali ab tym, što źvierchu spuščana zadańnie ab nieabchodnaści zabiaśpiečyć udzieł u daterminovym hałasavańni nie mienš za 60% vybarščykaŭ, a rabotniki sielsavietaŭ chadzili pa dvarach i zaklikali hałasavać daterminova», - skazaŭ U.Ryžkoŭ. Na jaho dumku, prymianieńnie takich technałohij u Rasii, naprykład u Sankt-Pieciarburhu, «zaŭsiody śviedčyć ab vykarystańni padčas vybaraŭ administracyjnaha resursu i nacisku na karyść kankretnych kandydataŭ». «Voś čamu daterminovaje hałasavańnie vyklikaje vialikija pytańni, jak i pieraškody ŭ praviadzieńni sustreč z vybarščykami apazicyjnych kandydataŭ i ich davieranych asob. Mnie raskazvali pra toje, što pradstaŭnikam apazicyi admaŭlali ŭ pradastaŭleńni załaŭ, kinateatraŭ i aŭdytoryj dla sustreč z hramadzianami, a taksama kanfiskoŭvali aŭdyjatechniku. Usio heta śviedčyć ab tym, što vybarčaja kampanija ŭ Biełarusi pravodziłasia ŭ nienarmalnych umovach i vybary nielha ličyć sumlennymi i demakratyčnymi, pakolki nie vykonvaŭsia pryncyp roŭnaści ŭmoŭ dla ŭsich kandydataŭ», - padkreśliŭ U.Ryžkoŭ.
Pavodle jaho słoŭ, 20 sakavika ŭ 9.00 u Minsku ŭ ofisie Abjadnanaj hramadzianskaj partyi adbudziecca pres-kanfierencyja z udziełam šerahu rasijskich palityčnych dziejačaŭ. Siarod ich - lider rasijskaha Sajuza pravych sił Mikita Biełych, U.Ryžkoŭ i sustaršynia Respublikanskaj partyi Rasii Uładzimir Łysienka.
U intervju BiełaPAN namieśnik staršyni AHP Alaksandr Dabravolski zaznačyŭ, što aficyjnyja vyniki hałasavańnia na vybarach kiraŭnika dziaržavy pa viadomych pryčynach nie buduć adpaviadać sapraŭdnamu volevyjaŭleńniu hramadzian i navat mohuć pieraŭzyści ŭzrovień 80% hałasoŭ, padadzienych za Alaksandra Łukašenku. «Sapraŭdnych ža vynikaŭ vybaraŭ, na žal, nichto ŭ Biełarusi viedać nie budzie, navat ułady. Heta źviazana z tym, što hałasy nie padličvajucca, a naziralniki z vybarčych učastkaŭ vypravadžvajucca. Tak, na ŭčastku № 13 u Minsku, dzie hałasavaŭ Alaksandr Milinkievič, naziralnika paprasili pakinuć učastak paśla jaho patrabavańnia pasadzić jaho na adlehłaści, dastatkovaj dla nazirańnia za dziejańniami členaŭ učastkovaj vybarčaj kamisii», - padkreśliŭ A.Dabravolski.
Krynica: BiełaPAN