Tydzień našaha žyćcia

Tydzień našaha žyćcia

«Aryjca» zabili...

U Miensku zabity lider tutejšaha adździaleńnia RNIE H.Samojłaŭ. Try nažavyja ranieńni, naniesienyja jamu ŭ padjeździe jahonaha domu, akazalisia śmiartelnyja. Nivodnaja ź biełaruskich radykalnych arhanizacyjaŭ nie ŭziała adkaznaści za hety akt. Zabojstva miascovaha fiurera moža pryvieści da razvału adyjoznaj supołki jak takoj. Likvidacyja H.Samojłava jašče raz jaskrava demanstruje ŭsiu chistkaść ruchu słavianskich šavinistaŭ u Biełarusi – jon abapirajecca na kupku asobaŭ, što raździmajuć jaho, vykarystoŭvajučy vysokaje asabistaje stanovišča. Zdajecca, jak tolki hetyja ludzi źniknuć, uvieś ichny hučny ruch sydzie na ništo. BT nadało zabojstvu lidera nacystaŭ vialikuju ŭvahu, jakuju možna patłumačyć tolki palityčnymi zacikaŭleńniami jahonaha novaha kiraŭnictva. Varta zhadać, što śmierć Mikoły Jermałoviča ŭvohule nie była zaŭvažanaja BT.

Eŭradelehacyja, što naviedała Biełaruś, niečakana pastaviła kropku: naziralnikaŭ z Eŭropy na vybarach nia budzie, mižnarodnaha pryznańnia najchutčej taksama. Adnačasova eŭrapiejcy zaklikajuć kandydataŭ ad demakratyčnych siłaŭ usio ž vyłučacca na vybary, kab ludzi mieli niejkuju alternatyvu.

Znoŭ padaražeŭ benzyn – jahonaja cana sioleta ŭźlacieła na 500%. Na AZS pry hetym pa-raniejšamu biazbožna nie dalivajuć, kantrolu nijakaha niama. A kałhasam paliva ŭsio nie staje. Hetak, jahonyja zapasy ŭ mahiloŭskim ahrapramie pahroźliva skaračalisia da trochdzionnych. Kałhasy jak dziravaja kišenia. U jaje kolki cukierak nia syp, jany ŭsio adno buduć pierakačoŭvać za chalavy taho, chto dziračku prakruciŭ. Padaraželi taksama harełka i pasłuhi mabilnaj suviazi.

Z 5 žniŭnia – jak nikoli rana — dazvolenaje palavańnie na vadapłaŭnuju i bałotnuju ptušku. Hetak zaŭčasu, bo daždžy časta prachodziacca i niama niebiaśpieki lasnych pažaraŭ. Za lipień apadkaŭ u Biełarusi vypała ŭ dva razy bolej za normu, a ŭ Prapojsku – u cełyja try razy. Pieršaja pałova žniŭnia, adnak, maje być śpiakotnaja. Hrybniki kažuć, što hetulki baravikoŭ nia bačyli daŭno, kolki sioleta. Za adzin lipień dziaržaŭnyja narychtoŭčyja punkty zakupili hryboŭ 40 t proci 20,4 t za hety ž čas letaś. Ale, idučy ŭ hryby, pamiatajcie, što ništo tak nie pryciahvaje radyjacyi, jak hetyja makramicety, što stajać u klasyfikacyi žyvoha pamiž raślinami j žyviołami. Navat u adnosna čystych rajonach jany nabirajuć radyjacyi pad samuju normu ci zvyš jaje. Asabliva heta datyčyć bahniukoŭ, kaźlakoŭ, palevikoŭ, kraśniukoŭ, babak. Biełarusy, što dbajuć pra zdaroŭje, ciapier hryboŭ ścierahucca.

A tam, dzie radyjacyjny fon i biez taho padvyšany, naprykład, u Kaściukovickim, Mahiloŭskim, Druckim, Kličaŭskim, Białynickim lashasach, iduć pieravyšeńni dapuščalnych normaŭ u 20—60 razoŭ.

Rekord žaŭcini pastaviła na hetym tydni hazeta «Źviazda», źmiaściŭšy ŭ sieradu na pieršaj staroncy nastupnuju infarmacyju Interfaksu. Cytujem:

«U minułyja vychadnyja ŭ lasnym masivie la v.Makiejeŭka Čačerskaha rajonu byŭ znojdzieny trup žančyny, jakaja znachodziłasia ŭ dekretnym vodpusku. Ekspertyza ŭstanaviła, što śmierć nastupiła ad pierałomu pazvanočnika. Čačerskim RAUS ustanoŭlena, što zabojstva ŭčyniŭ žychar rajcentru, jaki rastłumačyŭ, što śmiarotnuju traŭmu jaho siabroŭka atrymała «ŭ čas, kali jany zajmalisia kachańniem, u stanie ekstazu». Padazravajemy prademanstravaŭ hety sposab na manekienie pad čas śledčaha eksperymentu». Kaniec infarmacyi.

B.T.