Milinkievič: Vyniki vybaraŭ my nie pryznajem
Kandydat ad abjadnanaj apazycyi Alaksandar Milinkievič siońnia zajaviŭ pra niepryznańnie vynikaŭ učorašnich vybaraŭ.
(Milinkievič: ) «Vyniki vybaraŭ my nie pryznajem. U Biełarusi prajšli nie vybary, a niekanstytucyjny zachop ułady. Ciapierašni kiraŭnik krainy nia mieŭ prava ŭ ich udzielničać. Tamu, što nia byŭ lehitymnym referendum 2004 hodu, i tamu, što, pavodle dziejnaha zakanadaŭstva Biełarusi, Łukašenka nia mieŭ prava na ŭdzieł u ich. Tyja ŭmovy, u jakich prajšli vybary – jany niezakonnyja, represiŭnyja. Z momantu abviaščeńnia aficyjnych vynikaŭ vybaraŭ (praź niekalki dzion) my budziem ličyć, što la ŭłady ŭ Biełarusi budzie znachodzicca nielehitymny prezydent».
Alaksandar Milinkievič zaklikaŭ i ŭsie demakratyčnyja krainy śvietu nie pryznavać A.Łukašenku lehitymnym kiraŭnikom Biełarusi. Spadar Milinkievič vyłučyŭ svaje patrabavańni da ŭładaŭ:
(Milinkievič: ) «My patrabujem paŭtornych vybaraŭ, pad čas jakich budzie vykonvacca zakanadaŭstva krainy. Kab u kamisijach abaviazkova byli pradstaŭniki ad pretendentaŭ. Kab nie było aryštaŭ i pieraśledu pa miescach vučoby j raboty. Kab ułada admoviłasia ad režymu represijaŭ pry praviadzieńni vybaraŭ».
Spadar Milinkievič padkreśliŭ, što hetyja patrabavańni ŭłada moža ŭličyć tolki pad ciskam niazhodnych z abvieščanymi vynikami vybaraŭ. Jon zaklikaŭ narod vyjści ŭ paniadziełak na Kastryčnickuju płošču Miensku. Tolki z dapamohaj vulicy apazycyja zmoža raspačać žorstki dyjaloh z uładaj.
Kiraŭnik štabu Milinkieviča Siarhiej Kalakin paviedamiŭ, što vyniki vybaraŭ buduć abskardžany. Spasyłajučysia na vyniki apytańnia ekzyt-połu rasiejskaha centru «Levada». Spadar Kalakin zajaviŭ, što realna A. Łukašenka atrymaŭ nia bolš za 47 adsotkaŭ hałasoŭ.