My prybirajem kropki nad “i”!

My prybirajem kropki nad “i”!

Siońnia ŭ našaj “Piłaramie Analityčnaj” havorka pojdzie pra biełaruski blakbaster. Viadomy žurnalist Tykubovič, Zmahar niabačnaha frontu, analityk u cyvilnym Kaladop, samaja seksualnaja žurnalistka śvietu Talib, urač-futurolah Fiadupa i pravasłaŭny litaratar Kaściam abmiarkoŭvajuć sytuacyju, što skłałasia vakoł filmu “Lehienda pra Nastaśsiu Słuckuju”.

Tykubovič: Jak skončym žnivo, tak i voźmiemsia za narodny blakbaster. U suviazi z padrychtoŭkaj da zdymkaŭ u krainie znoŭ budzie abvieščana nadzvyčajnaje stanovišča. Harant Kanstytucyi ŭžo aščadziŭ patrebny miljard, urezaŭšy vystup Hazmanava na “Słavianskim bazary”. Ciapier u časie rabočych pajezdak pa rehijonach krainy jon nia tolki sočyć za chodam žniva, ale j padšukvaje najbolš vyhodnyja zdymačnyja placoŭki.

Kaściam: Ale ŭ suviazi z zaniataściu adnaje viadomaje rasiejskaje aktrysy i staraściu druhoj, niama kamu zdymacca ŭ hałoŭnaj roli.

Talib: Jak heta niama kamu? Šukajecie ŭsio ŭ Pucina dy ŭ Eŭropie, dzie daŭno ŭžo ŭsio prajhrana, a pad nosam u siabie nia bačycie! A ja, durnica, navat starasłavianskuju movu vyvučyła!

Zmahar: Biełaruskuju lepiej vyvučyła b!..

Fiadupa: Kalehi, kali b Biełaruś zachacieła kupić pakiet akcyjaŭ “Hazpramu”, chiba nam skazali b: “Biełarusy chočuć skupić Rasieju”? Chiba chto słova skazaŭ by? Ale zdymać filmy pra časy, kali sfera ŭpłyvu Maskoŭskaha kniastva skančałasia za Mažajskam… Heta niaścipła i nieetyčna.

Zmahar: Heta adpaviadaje histaryčnaj praŭdzie! Rasiejcy, darečy, kab pazbycca svajoj imperskaści, musili b zdymać filmy pra svaje parazy — “Bitva na Kałcy”, “Alhierd pad Maskvoju”…

Kaściam: Usim, chto nia bačyć roźnicy miž ihravym i dakumentalnym kino, ja, jak ekspert, kažu: realnaja historyja raźviedčyka Isajeva roźniłasia ad pastaŭlenaha pavodle jejnych matyvaŭ filmu “Čatyry tankisty i sabaka”. Tamu nia treba insinuiravać, što ŭ XVI stahodździ ŭ Biełarusi nie było kambajnaŭ! Kniahinia Nastaśsia ź jazyčnikam Budzimiram buduć lubicca mienavita na ich fonie! Scenar čytali piśmieńniki, što pišuć na histaryčnuju temu, i jany ŭsio adobryli!

Kaladop: I praŭda, kaleha, para ŭžo skazać usim hetym biełmoŭnym zmaharam: šavinizm, nacyzm i nacyjanalizm zaŭždy vyklikali varožaść, i heta zazvyčaj skančałasia krovapralitnymi vojnami. Takija ŭroki historyi, pra jakija zabyvacca nia varta, asabliva siońnia.

Kaściam: Darečy, a chto takija jazyčniki? Kataliki, chiba? Dyk jany ž jašče bolšyja našy vorahi, čym tatary! Uvohule, varta vykinuć z scenaru krymskich tataraŭ, jakija daŭno syšli z histaryčnaje sceny, i ŭpisać zamiest ich aŭtakiefalnikaŭ z Spasiukom na čale.

Tykubovič: Nie, hetyja ŭsio-taki pravasłaŭnyja, a suprać tataraŭ, zhodna z scenaram, u adzinym paryvie zmahajucca biełarusy, litviny, miascovyja tatary, habrei…

Kaściam: Mnie ahidna čuć, byccam biełarusy mahli z hetymi... hetymi…

Tykubovič: Jašče adna vakantnaja rola — jazyčnik Budzimir.

Kaladop: Jość infarmacyja z kampetentnych krynicaŭ: na sakretnym pasiedžańni Administracyi pytańnie ŭžo vyrašana. Zdymki filmu adkładzienyja na kaniec žniva. Heta značyć, rolu vykanaje abo najlepšy kambajner, abo…

Usie: Sam?!

Zmahar: Da čaho dajšoŭ antykanstytucyjny režym!

Talib: Lepiej užo pad kambajn! Chacia…

Ale tut padjechaŭ Azaronak sa zdymačnaj hrupaj i sfatahrafavaŭ usich na pamiać dla svajho novaha tryleru “Dzieci chłuśni — 7”.

Adździeł analityki