AHP na kantakt nie idzie
Na 11 z 30 vybarčych akruhaŭ pretendujuć pradstaŭniki partyj i hramadzkich abjadnańniaŭ, siabroŭ «Haradzienskaje inicyjatyvy». Piać inicyjatyŭnych hrup źbirajuć podpisy ŭ padtrymku vyłučencaŭ BNF, dźvie — Abjadnanaj sacyjał-demakratyčnaj partyi, pa adnoj — BSDH i miascovaha adździaleńnia Biełaruskaha Chielsynskaha kamitetu. Pradstaŭniki AHP źbirajuć podpisy asobna.
Adnak heta nie aznačaje, što nie adbudziecca vyłučeńnia kandydataŭ u deputaty pa partyjnych śpisach. U Horadni, praŭda, zarehistravana va ŭstanoŭlenym paradku tolki haradzkaja arhanizacyja taho ž BNF «Adradžeńnie». Jaje staršynia Alaksandar Michalčyk kaža, što partyja vystavić svaich kandydataŭ pa ŭsich akruhach horadu.
Na hetym etapie vybaraŭ u haradzki saviet iznoŭ nie ŭdałosia likvidavać supiarečnaściaŭ pamiž pretendentami na deputacki kvitok ad demakratyčnych siłaŭ. Kali častka pradprymalnikaŭ zdoleła adkinuć ambicyi j damoviłasia ź inšymi zacikaŭlenymi bakami ŭ padziele vybarčych akruhaŭ, to kiraŭnictva haradzkoj arhanizacyi AHP na kantakt nie idzie. U niekatorych akruhach siabry AHP stvarajuć kankurencyju pradstaŭnikam inšych demakratyčnych arhanizacyjaŭ. Takim čynam sutyknulisia staršynia abłasnoj arhanizacyi BCHK Alaksandar Antaniuk i pradstaŭnik abłasnoj arhanizacyi AHP Aleś Pahulajeŭ, što vyłučajecca ad kalektyvu vučelni, u jakoj vykładaje. U inšaj akruzie sutyknulisia aktyvist «Maładoha frontu» Vadzim Sarančukoŭ i staršynia haradzkoj arhanizacyi AHP Jury Istomin.
Mo jość racyja ŭ śćviardžeńniach, što AHP choča vykarystać momant, kab hučna zajavić pra siabie. Uzhadajem kolišniaje vystupleńnie Anatola Labiedźki ŭ prahramie «Vriemiena» Ŭładzimiera Poźniera. Tady biełaruski palityk zajaviŭ pra svoj udzieł u nastupnych prezydenckich vybarach. Kali heta tak, to zrazumiełaj stanovicca pazycyja AHPoŭcaŭ: kali nia vybracca, to pakazać siabie nibyta aktyŭnaj realnaj siłaj hramadztva — hladzi, narodzie, kolki nas, i my idziom svajoj darohaj!..
Asobna ad svaich adnapartyjcaŭ idzie na vybary i staršynia arhanizacyi «Haradzienski vybar», mastak, siabra BNF Źmicier Ivanoŭski.
Anton Łabovič, Horadnia