Załataja žyła antyamerykanizmu
Aficyjny Miensk pasprabuje skarystać raskoł miž zachodnimi sajuźnikami dla svajoj dalejšaj lehitymizacyi.
Jak u Biełarusi miascovyja vybary, dyk Ameryka abaviazkova niekaha bombić biaz sankcyi AAN. Prosta nasłańnio! Minuły raz — Kosava, ciapier — Irak. Tady sprava skončyłasia adździaleńniem Kosava i aryštam Miłošaviča. Štości hetkaje budzie i ciapier. Kali pačniecca. Bo nikoli jašče ZŠA nie sutykalisia z takim zaciatym supracivam chaŭruśnikaŭ pa NATO.
60-hadovy paŭnočnaatlantyčny manalit raskałoŭsia. Francuzy ŭspomnili, što jany pacyfisty. Ramsfeld daŭ žaru staroj Eŭropie, nieaściarožna pastaviŭšy joj u prykład Eŭropu «novuju».
Amerykanskaja presa — ź im. Kali b Ameryki nie isnavała, a Francyja zaŭždy pavodziła siabie tak, jak ciapier, dyk siońnia eŭrapiejcy razmaŭlali b pa-rasiejsku ci pa-niamiecku, iranizuje kamentatar «Ńju-Jork Tajmz». A kali b siabroŭ Rady Biaśpieki vybirali, jak kamandu zorak NBA, jon prahałasavaŭ by nie za Francyju, a za Indyju. Bo kali Indyi ŭsio adno, što stanie ź Irakam, dyk, u adroźnieńnie ad Francyi, jana choć hetaha nie chavaje.
Žurnalist bje pa samym słabym miescy praciŭnikaŭ vajny. Sapraŭdy, słaba vierycca ŭ idealizm niemcaŭ ci pacyfizm francuzaŭ. U analahičnaj sytuacyi ŭ Kosavie, kali z punktu hledžańnia mižnarodnaha prava ŭmiašańnie taksama vyhladała sumnieŭnym, jany pierakonvali Klintana nie marudzić. Eŭropa bajałasia chvali ŭciekačoŭ z Kosava.
Narody vystupajuć suprać pralićcia kryvi ščyra. A bolšaść palitykaŭ — kryvadušna. Nasamreč jany nia majuć ničoha suprać praciahu palityki inšymi srodkami — vajskovymi ci palicyjnymi. Vystupajučy suprać vajny, jany prosta vystupajuć suprać Ameryki. Bo na antyamerykaniźmie, jak i na luboj zajzdraści — naprykład da bahatych, — možna zarablać palityčny kapitał.
Padčas kosaŭskaha kryzysu było prosta. Łukašenkaŭcy abapiralisia na Maskvu i praduhadvali jaje pazycyju. Nacyjanalny ruch, što atajasamlivaje Biełaruś z Zachadam, padtrymlivaŭ pazycyju Zachadu, niahledziačy na pačućcio słavianskaje i pravasłaŭnaje salidarnaści. A ciapier jaki z Zachadaŭ padtrymać?
Biełaruskija praciŭniki vajny i prychilniki ZŠA hruntujucca na adnych maralnych vartaściach. Tolki vysnovy ŭ ich roźniacca.
Dla adnych vajna ŭ Iraku budzie prosta vajnoj. Dla druhich vajna ŭ Iraku budzie vajnoj suprać tatalitarnaj dyktatury. I ŭ druhim vypadku kraina, jakaja źviedała stalinščynu i hitleryzm, nia moža nie padtrymać vajny z Sadamam.
Isnuje sotnia pryčynaŭ, kab daviarać u hetaj sytuacyi ZŠA i intuicyi amerykanskich dyplamataŭ. Tym bolš što Štaty — susied našaha susieda.
U vypadku pieramohi ŭ Iraku Zachad umacujecca. I Biełaruś razam ź im, jak častka Zachadu. Urešcie, da padtrymki ZŠA schilaje toj fakt, što na baku Ameryki vystupili ŭsie krainy Centralnaje i Ŭschodniaje Eŭropy, zacisnutaje miž Niamieččynaj i Rasiejaj, usie — ad Estonii da Słavienii. (Možna havaryć pra poŭnaje fijaska niamieckaje ŭschodniaje palityki.)
Biełaruskaja dyplamatyja vybrała pazycyju salidarnaści ź Irakam, vykazaŭ jaje asabista kiraŭnik dziaržavy. Tolki hetkaja adkrytaja salidarnaść moža zaškodzić dyplamatyčnaj aktyŭnaści na eŭrapiejskim poli. Razumnaje staŭleńnie da zmahańnia ZŠA ź Niamieččynaj i Rasiejaj za ŭpłyŭ na Ŭschodniuju Eŭropu mahło b paspryjać lehitymizacyi ciapierašniaj ułady. Ale ŭsio ž praciŭnikaŭ ZŠA ŭ Eŭraźviazie mienšaść. Tamu nieviadoma, ci daść biełaruskaja taktyka plon.
Barys Tumar