Eŭropa čakaje ad Biełarusi siurpryzu
Francuski palitolah Žan-Šarl Lalman pryjechaŭ u Biełaruś, kab jašče raz na svaje vočy pabačyć abjekt, jaki jon užo dziesiać hadoŭ daśleduje. Jon piša knihu pra Biełaruś i Łukašenku. Z sp.Lalmanam hutaryć karespandent «NN».
«NN»: Čyj Vy palitolah — francuski ci eŭrapiejski?
Žan-Šarl Lalman: Francuski, bo ja francuz! Heta realnaść. Ale ž u toj samy čas ja jašče i žychar Eŭropy.
«NN»: Čym źjaŭlajecca Biełaruś dla Francyi i čym — Biełaruś dla Eŭropy? Kali, kaniečnie, pamiž hetymi paniaćciami treba pravodzić rysu.
ŽŠŁ: Ja spadziajusia, što roźnicy niama i što toje, što datyčycca Francyi, i toje, što datyčycca Eŭropy, — heta adnoje i toje ž. Pra Biełaruś užo viedajuć, choć pra jaje dahetul mała pišuć i mała havorać. Ale mnohija eŭrapiejcy ŭžo daznalisia, dzie na mapie śvietu znachodzicca horad Miensk. Dva hady tamu ŭ Paryžy prachodziŭ čempijanat śvietu pa lohkaj atletycy, mienavita tady ŭsie bujnyja francuskija hazety pa-sapraŭdnamu adkryli dla siabie Biełaruś — praz sport. Ale roźnica pamiž Biełaruśsiu i Rasiejaj dla šarahovaha nasielnictva niezrazumiełaja. Što datyčycca intelektuałaŭ, dyk pra Łukašenku ŭžo ŭsie čuli.
«NN»: Što Eŭropa čakaje ad Biełarusi?
ŽŠŁ: Kali kankretna, dyk ničoha. Nu, chiba što siurpryzu, nakštałt ukrainskaha.
«NN»: Ci ličyć Eŭropa dahetul, što možna demakratyzavać Biełaruś z dapamohaj Rasiei?
ŽŠŁ: Ciapier u Eŭropie zrazumieli, što takoje pucinski režym. Heta achałodžvaje i biez taho niaprostyja adnosiny z Rasiejaj. Tyja, chto cikavicca Biełaruśsiu, pryncypova nia chočuć, kab jaje prablemy vyrašalisia praz Maskvu. Nu a tyja, chto zaryjentavanyja na Maskvu, pra Biełaruś uvohule nie kłapociacca.
«NN»: Što Vy dumajecie pra skandał vakoł Sajuzu palakaŭ Biełarusi?
ŽŠŁ: Biełaruś usio bolš i bolš nahadvaje abłožanuju fartecyju. U jaje drennyja adnosiny z usimi susiedziami, navat z Rasiejaj. Akramia hetaha, kab mabilizavać nasielnictva, zaŭsiody možna adšukać zamiežnaha voraha. Tym bolš što ŭ časie Aranžavaj revalucyi Polšča adyhryvała vyklučna važnuju rolu — praź jaje moža iści padtrymka biełaruskaj apazycyi, što nie padabajecca režymu. Voś čamu Łukašenka karystajecca palitykaj dziaržaŭnaha nacyjanalizmu.
«NN»: Kim dla Vas jak dla palitolaha źjaŭlajecca Łukašenka?
ŽŠŁ: Dyktataram! Padobnym svaim papulizmam da dyktataraŭ Łacinskaj Ameryki. Ale jość i adroźnieńnie — jano palahaje ŭ tym, što taja sacyjalnaja palityka, jakuju nibyta pravodzić urad Łukašenki, — fikcyja. Praktyčna poŭnaja adsutnaść systemy medycynskaha strachavańnia, 20 dalaraŭ dapamohi pa biespracoŭi — heta nie sacyjalnaja palityka.
«NN»: Jaki Vaš prahnoz na 2006 h., kali zychodzić z realnaj sytuacyi, jakuju vy tut bačycie?
ŽŠŁ (śmiajecca): Možna raźličvać na jašče adnu piacihodku baraćby!
Hutaryŭ Aleś Kudrycki