Apošni pisk «ultravožykaŭ» — «Atlantyda» — uvajšoŭ u trojku najlepšych piesień u internetaŭskim hit-paradzie. A sajt «Majki patryjotaŭ» prapanuje nabyć sakołki z vyjavami zamyzhanych francužanak i vieršami Bykava.
Hazeta patryjotaŭ
Pry kancy žniŭnia ŭ Biełnecie raspačało pracu on-łajnavaje vydańnie «Biełorusskaja patriotičnaja hazieta» (www.bpg.h15.ru). Na hałoŭnaj staroncy — zdymak prezydenta, zboku — spasyłki na sajt prezydenta, «Sovietskuju Biełoruśsiju» i ahienctva BiełTA. Naviny — skroź pazytyŭnyja i pa-rasiejsku — biarucca ŭprost ź dziaržaŭnych ura-patryjatyčnych ŚMI. Rečaisnaść sama padvodzić da hratesku. «Da 1 vieraśnia Ministerstva kultury planuje vypuścić padarunkavy nabor cacak dla sadka pad nazvaju «Maleńki patryjot». U jaho ŭvojduć čyrvona-zialonyja kubiki, dziciačaje vydańnie «Sovietskoj Biełoruśsii» ŭ karcinkach i kanstruktar «Źbiary Nacyjanalnuju biblijateku».
Majki patryjotaŭ
Sajt moładzievaha ruchu «Limon» (www.limon.3dway.org) taksama padtrymlivaje prezydenta va ŭsich pačynańniach. «My chočam uźniać rejtynh prezydenta, jaki ŭpaŭ nižej niama kudy», — bjuć tryvohu jany ŭ manifeście. Udzielniki prajektu «Majki patryjotaŭ» (www.cafepress.com/bel_t_shirts) papularyzujuć słovy prezydenta. Praz sajt možna zamović «dyvanki dla myšy i kubki» ź jahonymi vykazvańniami. Možna taksama nabyć sakołki z vyjavami brudnych francužanak, Kandalizy Rajs (z cytataj pra nehraŭ na miažy Biełarusi) i chłopčyka, jaki «ŭziaŭsia za jajca». Sakołki z vyjavaj čyrvonaarmiejca z nadpisam «A ty čytaŭ vieršy Bykava?» kaštujuć ad $9,89 da 18,69. Arhanizatary źviartajuć uvahu na toje, što heta niekamercyjny prajekt, «usie hrošy iduć na apłatu chostynhu i na padtrymku talenavitaj moładzi pa linii BRSM».
Muzyka patryjotaŭ
Adzin z samych daścipnych prajektaŭ — muzyčny sajt «UltraVožyk» (www.luka.rocks.it), dzie raźmieščany synhł «Idealohija» dy inšyja pieśni. U adnych kampazycyjach vykazvańni prezydenta źmikšavanyja pad techna-rytmy, u niekatorych chłopcy piajuć sami: «U nas jość prezydent, i hierb svoj jość u nas / Z Rasiejaj my siabry, my lubim tanny haz / Kali niačesny ty, ty — apazycyja / Takaja našaja idealohija». Na sajcie źmieščanyja j zapisy inšych vykanaŭcaŭ. U pryvatnaści, zapisanaja ŭ 1995 h. «Lapisam Trubiackim» pieśnia «Łu-ka-šien-ko».
Apošni pisk «ultravožykaŭ» — «Atlantyda» — uvajšoŭ u trojku najlepšych piesień sezonu pavodle hałasavańnia na «Tuzinie hitoŭ».
Sproby prakuratury znajści tvorcaŭ sajtu «Mult-klub» tolki padahreli palityčna-satyryčny bum u Biełnecie. Biełarusy zamiežža pracujuć nad svaimi prajektami, a kaardynatar prajektu «Treci šlach» Pavał Marozaŭ, na sajcie jakoha źmieščany «Mult-klub» i «Limon», damoviŭsia pra supracu z ukrainskimi stvaralnikami fłešak pra Janukoviča. Ukraincy biarucca stvaryć nastupnyja seryi LLL-multoŭ.
Rejtynh satyryčnych internet-sajtaŭ
1. http://mult.3dway.org
2. http://www.luka.rocks.it (ci http://members01.chello.se/skywatcher/uv/index.htm-)
3. http://www.cafepress.com/bel_t_shirts
4. http://www.limon.3dway.org
5. http://www.bpg.h15.ru
