Miesiac tamu, 16 žniŭnia, u Melburnie pamior hramadzki dziejač Aleh Šnek.
Viestka pra jahonuju śmierć stała dla siabroŭ i znajomych sapraŭdnym šokam. Sp.Aleh vyhladaŭ kudy maładziejšym za svaje 75 hod, byŭ vielmi žvavym i pa-spartovamu aktyŭnym čałaviekam. Kiraŭnica vakalnaha hurtu «Kalina» (Melburn) Tamara Subač, paviedamlajučy pra śmierć sp.Aleha, napisała: «Hety viasioły čałaviek z šlachietnymi manierami vielmi lubiŭ svaju radzimu — Biełaruś. Jahony sychod — vialikaja strata dla ŭsioj biełaruskaj hramady ŭ Melburnie».
Aleh Šnek naradziŭsia 7 lutaha 1930 h. u Leninhradzie, dzie baćka vučyŭsia ŭ Vajskovaj akademii. Z baćkami daviałosia šmat pajeździć — Koraścień va Ŭkrainie, znoŭ Leninhrad, Čyta. Niahledziačy na heta, uletku Šneki staralisia vybracca na Słuččynu, u viosku Ladnyja. U 1939 h., zdavałasia, siamja pierajechała na Słuččynu kančatkova. Hodam raniej baćku vyklučyli z partyi, zvolnili ŭ zapas, i jon uładkavaŭsia nastaŭnikam u škołu. Adnak na radzimie pažyli tolki piać hod. U 1944-m, apasajučysia balšavickaha pieraśledu — Ściapan Šnek byŭ akruhovym kiraŭnikom Krajovaj abarony, syny — siabrami SBM — siamja pakidaje Biełaruś.
Z 18-hadovaha ŭzrostu Aleh Šnek musiŭ iści pracavać. Spačatku na kapalniach u Francyi, a ź pierajezdam u Aŭstraliju treba było zarablać na ŭłasnuju chatu j padtrymlivać materyjalna matku. U 1952 h. siamju napatkała trahiedyja — skončyŭ žyćcio samahubstvam baćka. Aleh pracavaŭ čarciožnikam u pradstaŭnictvie «Eryksan» u Melburnie, potym — u sfery vajskovych radaraŭ. Paralelna braŭ udzieł u hramadzkim žyćci. Spačatku — u Sajuzie biełaruskaj moładzi, a ŭ lahiery dla pieramieščanych asob u niamieckim Vatenštecie jon dałučajecca da biełaruskaha skaŭtynhu, biare ŭdzieł u arhanizacyi Biełaruskaha spartovaha abjadnańnia pry mižnarodnaj moładzievaj arhanizacyi YMCA.
U Aŭstralii jon byŭ adnym z arhanizataraŭ skaŭckaha źviazu «Ŭsiasłaŭ Čaradziej», futbolnaj, valejbolnaj, bakserskaj družyn, pracavaŭ u spartovym klubie «Zubr». Va ŭspaminach pisaŭ: «Ja zaŭsiody ćviorda vieryŭ, što praca z moładździu, asabliva ŭ halinie nacyjanalnaha sportu, dla papularyzacyi nacyi maje samaje vialikaje značeńnie».
Byŭ aktyvistam parafii carkvy Troch Vilenskich Pakutnikaŭ BAPC, a apošni hod navat raśpisvaŭ interjer budynku carkvy.
Z adychodam Aleha Šneka skončyŭsia značny peryjad historyi pavajennaj biełaruskaj emihracyi na zialonym kantynencie.
Aleh Hardzijenka
