U Nacyjanalnym akademičnym teatry imia Ja.Kupały 7 lipienia adbyŭsia ŭračysty viečar, pryśviečany 125-hodździu z dnia naradžeńnia narodnaha paeta.
«Janka Kupała - lubimy piaśniar biełaruskaha naroda, - adznačyŭ, adkryvajučy mierapryjemstva, namieśnik premjer-ministra Alaksandr Kosiniec. - Heta fienamienalnaja źjava, jakaja źjaviłasia na našaj ziemli, nibyta spuściŭšysia ź niabios».
Pavodle słoŭ A.Kosinca, paet «zrabiŭ vielizarny ŭniosak» u raźvićcio nacyjanalnaj kultury, «pa-fiłasofsku asensavaŭšy toje, što adbyvajecca na našaj ziamli». Ja.Kupała zdoleŭ padniać vieru ŭ nacyjanalnuju ideju na pačatku XX stahodździa, kali palityčnaja i ekanamičnaja situacyja nie dazvalała kazać, što isnuje biełaruskaja dziaržava, zaŭvažyŭ vice-premjer.
Jak padkreśliŭ staršynia Sajuza piśmieńnikaŭ Biełarusi Mikałaj Čarhiniec, Ja.Kupała «zakłaŭ asnovy biełaruskaj litaratury i pakazaŭ, padkazaŭ svajmu narodu, što treba rabić, kab žyć lepiej».
«Śviedčańniem tamu źjaŭlajecca toje, što ŭžo nie pytajucca «A chto tam idzie?» (vierš Ja.Kupały. - BiełaPAN), a adrazu adkazvajuć - heta iduć biełarusy. Tamu što ŭ ich samyja pryhožyja, prybranyja i čystyja vulicy, tamu što ŭ ich tak naładžana žyćcio, što jany pastajanna imknucca napierad», - skazaŭ M.Čarhiniec. Na jaho dumku, my śviatkujem dzień naradžeńnia Ja.Kupały tamu, što «narod paŭstaŭ i pierastaŭ nazyvacca tolki nasielnictvam niejkaha kraja: jon zrabiŭ svaju krainu suvierennaj, dužaj, niezaležnaj va ŭsich adnosinach».
M.Čarhiniec pradstaviŭ knihu «Janka Kupała» ź biblijateki, stvoranaj sioleta SPB. Jon paviedamiŭ, što pieršy ekziemplar vydańnia byŭ nakiravany Alaksandru Łukašenku. Aproč taho, M.Čarhiniec uručyŭ knihu A.Kosincu, Dziaržaŭnamu litaraturnamu muzieju Ja.Kupały i Kupałaŭskamu teatru.
