Šuškievič pra EHU: «Ja nie mahu tryvać, kali marksisty-lenincy vučać, vykładajuć i nie pakajalisia za svaje hrachi» 56

Były staršynia Viarchoŭnaha Savietu Stanisłaŭ Šuškievič pravioŭ anłajn-kanfierencyju na sajcie Radyjo Svabody. Pryvodzim samyja cikavyja adkazy.

— Vas papiaredžvali pra toje, što vas čakaje los Harbačova, pakolki vy siadzieli na dvuch kresłach, sprabujučy prymiryć BNF i Kamunistyčnuju partyju.

— Lepš kali niešta budzie, ale drenna — kali ničoha nia budzie.

I na kampramisy treba iści. Kampramisy — heta ruchavik demakratyi. Inšaha šlachu niama.

Niemahčyma abrać parlament, kab jon byŭ taki prabiełaruski, kab usie tam byli BNFaŭcy, — tamu što jość ludzi inšych pohladaŭ i ich treba pavažać, i treba ŭličvać ich padychody. Ja zaŭsiody prytrymlivajusia takoha padychodu.

— Ci adčuvajecie vy za saboju choć troški viny i adkaznaści za toje, što amal paŭmiljona podpisaŭ biełarusaŭ za novyja vybary ŭ VS byli, miahka kažučy, praihnaravanyja za košt vašaj słaboj voli i navat zdradnickaj pazicyi ŭ šukańni «zhody» z kamunistyčnaj bolšaśćciu, chacia Zakon patrabavaŭ inšaha? My tady nie mieli b taho, što majem siońnia.

— Vy mnie prabačcie, ale chočacca nazvać Vaša pytańnie nie zusim razumnym. Ja nia moh zrabić, kab adbyŭsia referendum.

Ja moh tolki pastavić heta pytańnie na Viarchoŭnym Saviecie, kab adbyŭsia referendum. My stavili, heta pytańnie, ale Viarchoŭny Saviet jaho adkinuŭ. Što možna było jašče zrabić? — ničoha.

A ciapier, zaŭvažcie, ja Vam pa sutnaści pytańnia adkažu: kińcie «daić» hetyja časy, 1991–92 hady. Hladzicie ŭ budučyniu. Čamu Vy siońnia ničoha nia robicie, kab Biełaruś była volnaj i niezaležnaj?!. Ničoha ž nia robicie, tolki jazykom plavuzhajecie, abmiarkoŭvajučy hetyja staryja pytańni!.. Zaŭvažcie, što zrabiŭ Biełaruski Narodny Front: heta była cudoŭnaja struktura ŭ 1988 hodzie, heta była cudoŭnaja struktura ŭ 1991–1992 hadach, kali 25 čałaviek časami viali za saboj faktyčna ŭ dziesiać razoŭ bolš apanentaŭ, i prymalisia rašeńni ŭ Viarchoŭnym Saviecie. I paviercie, što ja prykłaŭ ruku da taho, što jany prymalisia. Inakš by jany nie byli pryniatyja. Ale Biełaruski Narodny Front chacieŭ bolšaha, — heta značyć nia ŭmieć uzvažyć svaje siły, nia ŭmieć razabracca. I što my atrymali?..

Praanalizujcie vyniki vybaraŭ 1995–1996 hoda: nivodnaha pradstaŭnika BNF nie abrali ŭ parlament. Na spraviadlivych, sumlennych vybarach. Čyja heta pamyłka: narodu ci BNF? — Heta pamyłka BNF. Tamu što jany nie zmahli acanić svaje siły, i nie padciahnuli aboz.

Jany pierastali pracavać ź ludźmi, a pracavali tolki ŭ parlamencie. Heta vialikaja pamyłka. I treba hetu pamyłku vypraŭlać, a lepiej — pracavać tak, kab Biełaruś zaćvierdziłasia biełaruskaj.

— Čamu Spadar ličyć EHU antybiełaruskim univiersitetam? U EHU vučycca vielmi šmat hodnych biełaruskich patryjotaŭ, jakija lubiać Biełaruś, svaju movu i narod. Abhruntujcie svaje pohlady na temu EHU, kali łaska.

— Ja nikoli nia mieŭ pretenzij da tych, chto vučycca ŭ hetym universytecie i nikoli nie rabiŭ zaŭvah na ich adras, ale

ja nie mahu tryvać, kali marksisty-lenincy, jakija kazali, što panavańnie marksizmu-leninizmu va ŭsim śviecie — heta harantyja dabrabytu ŭsiaho na śviecie, — kali hetyja ludzi vučać, vykładajuć i nie pakajalisia za svaje hrachi.

Pračytajcie raździeł majoj knižki pra intelihiencyju. Tam Vy znojdziecie persanalna tych, chto ŭ Eŭrapiejskim humanitarnym universytecie naviazvaje antybiełaruskaść.

cyt. Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH