Minsielhascharč paćvierdziŭ pieravyšeńnie pastavak charčavańnia ŭ Rasiju 4

U Ministerstvie sielskaj haspadarki i charčavańnia Biełarusi pryznajuć, što pieravyšeńnie pastavak u Rasiju biełaruskaha charčavańnia pa niekatorych pazicyjach sapraŭdy maje miesca.

«Jość pieravyšeńnie pa niekatorych pazicyjach», — skazała BiełaPAN pres-sakratar Minsielhascharča Volha Sradniova na prośbu prakamientavać učarašniuju zajavu namieśnika ministra sielskaj haspadarki RF Illi Šastakova.

U toj ža čas jana nie stała kankretyzavać, jakija mienavita hrupy tavaraŭ pastaŭlajucca ŭ abjomie, jaki pieravyšaje dvuchbakovyja damoŭlenaści.

U lutym, dadała pres-sakratar, płanujecca pravieści pasiadžeńnie sumiesnaj kalehii ministerstvaŭ sielskaj haspadarki dźviuch krain, na jakim i budzie ŭzhadniacca prahnozny bałans popytu i prapanovy pa asnoŭnych vidach sielhaspradukcyi na 2013 hod.

25 śniežnia ŭ Maskvie namieśnik ministra sielskaj haspadarki RF zajaviŭ žurnalistam, što rasijski bok zaniepakojeny značnym pieravyšeńniem uzhodnienaha abjomu pastavak niekatorych hrup charčavańnia ź Biełarusi, u toj čas jak Minsk prosić ab pavieličeńni abjomaŭ uvozu svaich tavaraŭ u Rasiju.

Minsielhas Rasii hatovy ŭ čymści pajści nasustrač, adnak nastojvaje na vykanańni damoŭlenaściaŭ z boku krainy-partniora, adznačyŭ Šastakoŭ. «Našu zaniepakojenaść vyklikaje istotnaje pieravyšeńnie ŭzhodnienych abjomaŭ pastavak małočnaj i miasnoj pradukcyi ź Biełarusi», — zajaviŭ pradstaŭnik Minsielhasa.

Pavodle jaho słoŭ, pry vyznačanym na 2012 hod abjomie ŭvozu małočnaj pradukcyi 3,7 młn. ton (u pieraliku na małako) faktyčny abjom pastavak składzie, zhodna z prahnozam Minsielhasa RF, 4,1 młn. ton, da taho ž nazirajecca «častkovy dempinh».

Minsielhas RF taksama adznačaje, što pastaŭki miasa pry ŭzhodnienym abjomie 170 tys. užo skłali 332 tys. ton. Abjom uvozu miasa ptuški pieravyšaje ŭzhodnieny abjom u šeść razoŭ, śvininy — u 2,5 razu, u značnym abjomie ŭvoziacca miasapradukty. Pry hetym rasijski bok sumniavajecca, što ŭsio miasa, jakoje ŭvozicca z krainy, maje biełaruskaje pachodžańnie.

«Z adnaho boku, Biełaruś prosić pavialičyć im impartnyja kvoty na pastaŭki miasa z trecich krain. Z druhoha boku, my bačym, što hetaje miasa abo šlacham zamiaščeńnia, abo tranzitam idzie da nas. I my čuli zajavy nieaficyjnych asob, što im heta vielmi vyhadna», — zajaviŭ Šastakoŭ.

Pavodle jaho słoŭ, Minsk prapanoŭvaje na nastupny hod pavialičyć dla Biełarusi abjomy pastavak miasa i małaka ŭ Rasiju: pryčym, pavialičyć nie prosta adnosna ŭzhodnienych na 2012 hod abjomaŭ, a faktyčnych abjomaŭ pastavak, i na «dziasiatki pracentaŭ».

«Ale tut budziem adstojvać pazicyju rasijskich vytvorcaŭ. My nie suprać pavieličeńnia pastavak, ale, pa-pieršaje, jano nie pavinna iści takimi tempami, a pa-druhoje, našy partniory pavinny iści ŭ ramkach uzhodnienych abjomaŭ, kab naš rynak moh razumieć, jakija dadatkovyja abjomy pastupajuć na rasijski rynak», — padkreśliŭ namieśnik kiraŭnika Minsielhasa RF.

Treba adznačyć, što na minułym tydni ŭ Maskvie prajšła sustreča ministra sielskaj haspadarki Rasii Mikałaja Fiodarava ź ministram sielskaj haspadarki i charčavańnia Biełarusi Leanidam Zajcam. U aficyjnym pres-relizie pa vynikach pieramoŭ paviedamlałasia, što baki abmierkavali pierśpiektyvy ŭzajemnaha handlu, a taksama prablemnyja pytańni, źviazanyja z hetym.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH