U Biełarusi zaćvierdžany płan dziejańniaŭ dziaržaŭnych orhanaŭ i ŭdzielnikaŭ finansavaha rynku pa pavyšeńni finansavaj adukavanaści nasielnictva na 2013—2018 hady. Adpaviednaja sumiesnaja pastanova Savieta ministraŭ i Nacyjanalnaha banka № 31/1 pryniata 17 studzienia.
Jak paviedamlajecca na sajcie ŭrada, buduć ažyćcioŭleny miery pa raźvićci kultury finansavych pavodzinaŭ nasielnictva, jakaja pačynajecca z płanavańnia siamiejnaha biudžetu, u tym liku na praciahłuju pierśpiektyvu. Hramadzianie pavinny mieć chacia b minimalnaje ŭjaŭleńnie pra ryzyki i dachodnaść, pracentnyja staŭki, inflacyju, adroźnieńnie pamiž najaŭnymi i bieznajaŭnymi płaciažami, ipateku, pryncypy funkcyjanavańnia finansavaha rynku, pryrodu i funkcyi finansavych instytutaŭ, finansavyja instrumienty. Taksama pavinna być razumieńnie pačatkaŭ jurydyčnaj i padatkovaj adukavanaści, vałodańnie minimalnym finansavym słoŭnikam.
Ludziam nieabchodnyja i ŭmieńnie čytać damovu, razumieć infarmacyju, što ŭtrymlivajecca ŭ joj, paraŭnoŭvać prapanovy roznych finansavych ustanoŭ, zdolnaść padličyć, kolki daviadziecca płacić pa kredycie, i mnohaje inšaje.U suviazi z hetym pad finansavaj adukavanaściu nasielnictva ŭ dakumiencie razumiejecca zdolnaść hramadzian efiektyŭna kiravać asabistymi finansami, ažyćciaŭlać ulik raschodaŭ i dachodaŭ damašniaj haspadarki, karotkaterminovaje i doŭhaterminovaje finansavaje płanavańnie.
Płanam praduhledžana finansavaje navučańnie moładzi, navučańnie pa miescy pracy, praca sa ŚMI, inšyja infarmacyjna-rastłumačalnyja prahramy. Buduć praviedzieny daśledavańni šlacham sacyjałahičnych apytańniaŭ, ankietavańni pa vymiareńni dastupnaści finansavych pasłuh dla nasielnictva i małoha pradprymalnictva. Štohod buduć zaćviardžacca płany ŭzajemadziejańnia sa ŚMI pa pytańniach aśviatleńnia dziaržaŭnaj ekanamičnaj palityki.
Va ŭstanovach adukacyi pryznačana ŭvieści fakultatyŭnyja zaniatki pa vyvučeńni pytańniaŭ finansavaj kampietentnaści.Praduhledžany mierapryjemstvy pa pavyšeńni finansavaj kampietentnaści dla najmienš sacyjalna abaronienych hrup nasielnictva. Taksama budzie vieścisia praca pa pavyšeńni finansavaj kampietentnaści ŭ śfiery rynku kaštoŭnych papier, u padatkovaj i śfiery strachavańnia.
Analizam vykanańnia mierapryjemstvaŭ budzie zajmacca mižviedamasny kaardynacyjny saviet pa pavyšeńni finansavaj kampietentnaści nasielnictva.
