Žonka i dačka Statkieviča atrymali premiju Brandta 8

Mikałaja Statkieviča, jaki znachodzicca ŭ turmie sa śniežnia 2010 hoda, pradstaŭlali jaho dačka Kaciaryna Statkievič (druhaja sprava) i jaho žonka Maryna Adamovič (źleva).

Padčas uručeńnia na ekranie źmianialisia słajdy z fota Statkieviča.

Maryna Adamovič razmaŭlaje z kandydatam na pasadu kanclera ad SPD Piejeram Štajnbrukam.

Maryna Adamovič razmaŭlaje z Ehanam Baram.

Siarod hanarovych haściej byŭ eks-kancler FRH Hierchard Šroder.

Momant uručeńnia.

24 studzienia ŭ Bierlinie adbyłosia ŭručeńnie 2-j Mižnarodnaj premii imia Vili Brandta. Ad imia Mikałaja Statkieviča premiju atrymali jaho žonka — Maryna Adamovič i dačka — Kaciaryna Statkievič.

Jak paviedamlałasia raniej, Mikałaj Statkievič byŭ uhanaravany Mižnarodnaj premijaj imia Vili Brandta «Za asablivuju palityčnuju mužnaść», jakaja sioleta ŭručajecca druhi raz.

Premiju atrymaŭ taksama narviežski prem'jer-ministr Jens Stołtenbierh, jaki ŭhanaravany za «prykładnuju prychilnaść da demakratyi». Jak adznačana ŭ rašeńni žury, jon zdoleŭ zhurtavać narviežskaje hramadstva u adkaz na vyklik teraryzmu.

Paśla trahičnaha i strašnaha teraktu ŭ Osła i na vostravie Utaj, jaki adabraŭ žyćci 77 čałaviek, narviežski premjer pryniaŭ rašeńnie i skazaŭ słovy, jakich čakała hramadstva. Pierad uručeńniem uznaharody kandydat na kanclera ad SDPH Pier Štajnbruk pracytavaŭ hetyja słovy Jensa Stołtenbierha: «Narviehija adkaža na hety napad bolšaj demakratyjaj, bolšaj adkrytaściu, bolšaj salidarnaściu, ale nikoli nie naiŭnaściu».

Pierad uručeńniem premii Mikałaju Statkieviču z pramovaj vystupiŭ staršynia žury, prafiesar Ehan Bar, na praciahu doŭhich hadoŭ blizki siabra i paplečnik Vili Brandta. Jon, u pryvatnaści, skazaŭ: «Mikałaj Statkievič byŭ kandydatam u prezidenty na vybarach, jakija nie byli ni svabodnymi, ni spraviadlivymi… Jon viedaŭ, što jon kidaje vyklik aŭtarytarnamu režymu ŭ Minsku. Jaho adzinaje «złačynstva», u jakim jon byŭ vinavaty, była jaho prychilnaść da demakratyčnych vybaraŭ.

Premija, jakaja ŭručajecca siońnia, nosić imia Vili Brandta. Jamu naležyć vyraz: «Dzie svaboda nie abaroniena svoječasova, adnavić jaje možna tolki koštam vialikich achviar!»

Dalej jon skazaŭ:«Słova „demakratyja“ maje dla nas mahičny sens. Demakratyja źjaŭlajecca dušoj našaj partyi. My kažam: chaj Mikałaj statkievič i inšyja palityčnyja źniavolenyja narešcie buduć vyzvalenyja!»

Na cyrymonii ŭručeńnia premii ŭ Willy Brandt House prysutničała bolš za 600 čałaviek. Zarehistravałasia ž kala 1000, ale zała nie mahła ŭmiaścić usich žadajučych. Ludzi stajali i siadzieli ŭ prachodach, na prystupkach leśvicy. Siarod haściej byli viadomyja niamieckija i jeŭrapiejskija palityki, členy ŭrada, Bundestaha i Jeŭraparłamienta, u tym liku Hierchard Šroder, Pier Štajnbruk, Franc Cionies, byłyja i sučasnyja kiraŭniki SDPH (SPD).

Maryna Adamovič začytała pryvitalnyja słovy Mikałaja Statkieviča, ź jakimi jon źviarnuŭsia da prysutnych z-za krataŭ.

Pierakładała ich dačka palityka, Kaciaryna Statkievič. Hety vystup prysutnyja vitali avacyjami. Usia zała ŭstała.

Kaža žonka palityka: «Ja navat nie mahła ŭjavić sabie takoha.

Na praciahu našaha vystupu na scenie mianialisia słajdy z fotazdymkami Mikałaja. A paśla jaho zaviaršeńnia ŭsia zała ŭstała i niekalki chvilinaŭ avacyjami vitała Mikałaja. Nam kazali: „Vy tut siarod siabroŭ. My budziem i nadalej rabić usio, što ŭ našych siłach, dziela jaho vyzvaleńnia, dziela demakratyi ŭ Biełarusi“.

Dla mianie heta — samaje jaskravaje śviedčańnie, što salidarnaść nie maje miežaŭ. Jana moža prajści praz turemnyja mury.

Ja nikoli nie zabudusia, što na pačatku studzienia 2011 hoda mienavita pradstaŭniki niamieckaj i mižnarodnaj sacyjał-demakratyi pieršymi pryjechali ŭ Minsk, kab daviedacca ab losie Mikałaja i damahacca jaho vyzvaleńnia, i vyzvalennija inšych palitviaźniaŭ, niezakonna zachoplenych paśla vybaraŭ. Jany praciahvajuć rabić heta i siońnia. Dziakuj!».

Statkevich.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH