Pra heta zajaviŭ kamisar ES pa pytańniach enierhietyki Hiunter Etynhier.
U supracoŭnictvie ź mižnarodnymi finansavymi instytutami — Jeŭrapiejskim inviestycyjnym bankam, Jeŭrapiejskim bankam rekanstrukcyi i raźvićcia i Suśvietnym bankam — Jeŭrapiejskaja kamisija hatovaja padtrymać madernizacyju ŭkrainskaj hazatranspartnaj infrastruktury.
Meta hetaj madernizacyi ŭ tym, kab Ukraina zastavałasia klučavoj častkaj Usiejeŭrapiejskaj enierhietyčnaj sistemy, padkreśliŭ Etynhier.
Reformy hazavaha siektara ŭ adpaviednaści z praviłami Enierhietyčnaj supolnaści zabiaśpiečać Ukrainie dostup da bujnoha hazavaha rynku ES, a značyć, i mahčymaść ekspartavać u ES haz ułasnaj vytvorčaści.
«Jeŭrasajuz imkniecca vyrašyć pytańnie hazavych patokaŭ, jakija buduć pastupać u ES, u ramkach zbałansavanaha trochbakovaha dyjałohu pamiž ES, Ukrainaj i Rasijaj. Taksama Jeŭrasajuz choča dałučycca da trochbakovych kansultacyj adnosna tranzitu hazu», — adznačyŭ jeŭrakamisar.
Paśladoŭnaja prychilnaść reformam zhodna z Damovaj ab Enierhietyčnaj supolnaści stanoŭča paŭpłyvaje na stan enierhietyčnaj biaśpieki i niezaležnaści Ukrainy, ličyć Hiunter Etynhier.
«ES pierakanany, što siabroŭstva Ukrainy ŭ Enierhietyčnaj supolnaści ŭ bolšaj stupieni adpaviadaje jaje ŭłasnym intaresam», — piša jeŭrakamisar.
Akramia taho, jak adznačaje Etynhier, siabroŭstva ŭ Enierhietyčnaj supolnaści praduhledžvaje sumiesnaje ź ES praviadzieńnie dyviersifikacyi pastavak, pavieličeńnie enierhietyčnaj niezaležnaści Ukrainy i harantavańnie biaśpieki pastavak u karotka- i doŭhaterminovaj pierśpiektyvie. «Kijeŭ užo ŭdała vykarystoŭvaje hetuju mahčymaść. Ź listapada 2012 Ukraina atrymlivaje haz z Hiermanii i Polščy (praz reviersnyja patoki) pa našmat nižejšych cenach, čym tyja, pa jakich jana kuplaje haz u Rasii. Taksama Ukraina raspracoŭvaje dva dadatkovyja sposaby reviersnych pastavak pryrodnaha hazu ź Jeŭropy, a mienavita sa Słavakii i Vienhryi», — piša aŭtar.
«U budučyni Ukraina pavinnaja atrymać dostup nie tolki da lišniaha rasijskaha hazu, prysutnaha ŭ Zachodniaj Jeŭropie, ale i da hazu na mižnarodnych rynkach», — padkreśliŭ jeŭrakamisar.
Etynhier adznačaje, što ES imkniecca vyvučyć mahčymaść stvareńnia «hazavych kalidoraŭ» z metaj zabiaśpiečańnia bolš praciahłych varyjantaŭ dyviersifikacyi hazapastavak. «Naprykład, možna vykarystoŭvać dziejnyja trubapravody ŭ Zachodniaj Ukrainie, jakija viaduć u Rumyniju, Vienhryju, Słavakiju i Polšču», — havorycca ŭ artykule.
«Ukrainskaja hazatranspartnaja sietka i patencyjał jaje padziemnych schoviščaŭ (jany zdolnyja zachoŭvać 31 młrd kubamietraŭ hazu; usie hazaschoviščy ES majuć ahulnuju ŭmiaščalnaść 95 młrd) mohuć i ŭ dalejšym pryciahvać inviestycyi i mieć vialikuju kaštoŭnaść, kali haz zmoža pastaŭlacca va Ukrainu ź ES — dla spažyvańnia abo zachoŭvańnia», — padkreśliŭ jeŭrakamisar.
Raniej Hiunter Etynhier nie pryznaŭ krytyki z boku Ukrainy adnosna Enierhietyčnaj supolnaści i, u pryvatnaści, jaje pazicyi ŭ pytańni pabudovy abychodnych hazapravodaŭ vakoł Ukrainy.
Pry hetym jeŭrakamisar vykazaŭ pierakanańnie, što ŭdzieł u Enierhietyčnaj sadružnaści daje Ukrainie peŭnyja pieravahi. Tak, pavodle jaho słovaŭ, Ukrainie było b našmat składaniej padpisać kantrakt z Shell pa zdabyčy słancavaha hazu, kali b jana nie była ŭdzielnikam Enierhietyčnaj sadružnaści.
Łukašenku stała drenna na samicie ŠAS u Kazachstanie — Dožd́7
Kamientary