U Homielskaj vobłaści pačałasia pavodka.
Pa stanie na 24 lutaha ŭzrovień vady ŭ race Prypiać (u rajonie hidrapasta vioski Černičy Žytkavickaha rajona) dasiahnuŭ 498 sm, heta ŭsiaho na dva santymietry nižej za niebiaśpiečny ŭzrovień u 500 sm. Vada vyjšła na pojmu.
Jak paviedamili ŭ pres-słužbie Homielskaha abłasnoha ŭpraŭleńnia MNS, pavodkavymi vodami raki Prypiać adbyłosia padtapleńnie padvorkaŭ u vioscy Pieraroŭski Młynok (Pietrykaŭski rajon). Na race Pcič, prytoku Prypiaci, u rajonie hidrapasta vioski Łučycy Pietrykaŭskaha rajona ŭzrovień vady skłaŭ 342 sm i pieravysiŭ niebiaśpiečnuju miažu, jakaja składaje 330 sm, vada vyjšła na pojmu.
Kala vioski Łučycy padtoplena 100 mietraŭ aŭtadarohi Łučycy — Chvojnia (hłybinia 20—40 sm). Prajezd pa hetaj darozie mahčymy tolki transpartam pavyšanaj prachodnaści. Žyćciadziejnaść u vioscy Chvojnia nie parušana.
U vypadku niemahčymaha prajezdu pa hetaj aŭtadarozie jość abjaznaja daroha cieraź viosku Kołki (14 km). Pahrozy žyłym damam, haspadarčym pabudovam, administracyjnym budynkam niama.
Kamientary