U paniadziełak ministr adukacyi Siarhiej Maskievič prezientavaŭ kalektyvu HrDU novapryznačanaha rektara Andreja Karala. Na pasiedžańni prysutničali haradzienskija čynoŭniki z abłasnoha i haradskoha adździełaŭ adukacyi.
Paśla Maskieviča ŭziaŭ słova staršynia abłasnoha vykanaŭčaha kamiteta Siamion Šapira. «Nakont Čarniakieviča prymaŭ zahad ja asabista», — raskryŭ tajamnicu zvalnieńnia historyka i dacenta HrDU Šapira.
U svaim vystupleńni jon pachvaliŭ univiersitet za technałahičnyja dasiahnieńni i raskrytykavaŭ za promachi ŭ ideałahičnaj pracy. Pra heta «Biełsatu» raspaviała adna z prysutnych na siońniašniaj sustrečy ŭ HrDU.
«Napisali padručnik i nadrukavali za miažoju. Za čyje hrošy? — vystupaŭ hałoŭny čynoŭnik Haradzienščyny. — Nie, kab da mianie pryjści i pahavaryć!».
Šapira ŭpiknuŭ byłoha rektara Jaŭhiena Roŭbu, što toj marudziŭ sa zvalnieńniem Andreja Čarniakieviča praz svajo znajomstva z baćkam historyka, jaki taksama pracavaŭ va ŭniviersitecie. Staršynia abłvykankama pryznaŭsia, što jon ułasnaručna daŭ zahad zvolnić adnaho z aŭtaraŭ padručnika «Hrodnaznaŭstva» Andreja Čarniakieviča.
Siamion Šapira taksama padzialiŭsia z prysutnymi, što rehularna čytaje zvodki KDB i viedaje ŭsio: «Va ŭniviersitecie šasnaccać čałaviek, jakija zaklikajuć źvierhnuć uładu». Hetyja nienazvanyja nienadziejnyja elemienty nie prosta zaklikajuć zrynuć uładu, ale jašče i… jeździli na rovarach i plaskali ŭ ładki.
Vidavočna, havorka pra vykładčykaŭ, jakija trapili ŭ «čornyja śpisy» palityčna nienadziejnych. Śpiecsłužby pra heta pamoŭkvajuć, zatoje staršynia abłvykankama raskazaŭ u prystupie ščyraści.
Niamała ž takich, kali ŭ adnym univiersitecie naličyli až 16!
Darečy ŭ miascovych hazietach — «Hrodzienskaja praŭda», «Viačerni Hrodna», «Pierśpiektyva» -, a taksama na aficyjnym sajcie HrDzU pra siońniašniuju padzieju nie napisana ni słova.
Skandał z padručnikam «Hrodnaznaŭstva» razhareŭsia letaś u vieraśni, kali z farmuloŭkaju «za parušeńnie pracoŭnaj dyscypliny» z HrDU zvolnili adnaho z aŭtaraŭ — Andreja Čarniakieviča. Za dva dni da zvalnieńnia vykładčyka terminova vyklikaŭ da siabie zahadčyk centru kadravaj i pravavoj raboty ŭniviersitetu. Padčas razmovy ŭ kabiniecie prysutničali zahadčyk adździełu biaśpieki ŭniviersitetu i pracaŭnik KDB. Hałoŭnaju temaj razmovy byŭ padručnik «Hrodnaznaŭstva».
