«Cyničnaj raspravaj nad mirnymi ludźmi» nazvaŭ likvidacyju namiotavaha haradku Alaksandar Milinkievič. Na jahonaj presavaj kanferencyi pabyvaŭ karespandent Radyjo Svaboda.
Padčas načnoj specaperacyi na Kastryčnickaj płoščy Miensku zatrymali kala 500 čałaviek, – takuju ličbu nazvaŭ na siońniašniaj presavaj kanferencyi Alaksandar Milinkievič. Štab Milinkieviča dahetul nia moža atrymać śpisu z proźviščami ludziej, jakich zatrymała milicyja. Siarod zatrymanych i syn žonki Milinkieviča Ihar. Umovy ŭ specpryjomniku na Akreścina Alaksandar Milinkievič nazvaŭ vielmi ciažkimi. Jon skazaŭ, što ŭ štab pa mabilnym telefonie patelefanavali dziaŭčaty z kamery specpryjomniku – u kamery ich 17 čałaviek. Jany raspaviali, što niekatorych ludziej paśla zatrymańnia źbivali ŭ milicejskich mašynach. Častku ludziej advieźli ŭ rajon Navinak, a častku – u turmu «vaładarku». Alaksandar Milinkievič tak acaniŭ dziejańni ŭładaŭ:
(Milinkievič: ) «Toje, što zroblena ŭładaj, jość cyničnaj raspravaj ź mirnymi ludźmi. Ułada nia mieła prava ŭžyvać siłu. Ułada ŭ vielmi drennym psychičnym stanie, u jaje isteryka, i heta adčuvajecca. Ja mieŭ nadzieju, što jany dazvolać hetym ludziam mirna stajać da 25 sakavika. Ja dumaju, toj, što prajaždžaŭ na limuzinie, strašenna nervujecca. Miarkuju, što heta rasparadžeńnie samaha vysokaha ŭzroŭniu».
Alaksandar Milinkievič pierakanany: ułada rychtavałasia da likvidacyi namiotavaha haradku. Što adbyvajecca z zatrymanymi ŭdzielnikami akcyi pratestu, nia viedajuć navat ichnyja svajaki, jakija stajali ranicaj kala specpryjomniku. Alaksandar Milinkievič udziačny hetym ludziam, jakija padtrymlivajuć svaich dziaciej i nie paprakajuć jaho za toje, što ichnyja rodnyja apynulisia ŭ źniavoleńni.
«Na hetaj maleńkaj terytoryi svabody byli najlepšyja pradstaŭniki našaj nacyi, jakija pieraadoleli strach», – skazaŭ Alaksandar Milinkievič. Jon spadziajecca, što demakratyčnyja krainy Zachadu vystupiać u abaronu źniavolenych, buduć damahacca ichnaha vyzvaleńnia i ŭviaduć sankcyi suprać biełaruskich uładaŭ. Milinkievič zaklikaŭ kiraŭnictva Rasiei dałučycca da hetych patrabavańniaŭ.
Niahledziačy na represii ŭładaŭ, Alaksandar Milinkievič zaklikaŭ ludziej pryjści 25 sakavika na Kastryčnickuju płošču, kab adznačyć 88-ju hadavinu abviaščeńnia Biełaruskaj Narodnaj Respubliki j vykazać svaju salidarnaść sa źniavolenymi.
