 |
Na 22 žniŭnia zaplanavanaja sustreča prezydentaŭ Biełarusi j Rasiei. Čakajecca, što pieramovy z udziełam dvuch prezydentaŭ projduć u Sočy. Pra sustreču lideraŭ dźviuch krain paviedamiła krynica ŭ dyplamatyčnych kołach Rasiei. Ananimnaja krynica adznačyła, što sustreča z Alaksandram Łukašenkam zaplanavanaja pracoŭnym hrafikam prezydenta Rasiei.
«Najchutčej, padčas sustrečy havorka pojdzie pra haz, naftu j kredyt, jaki Biełaruś choča atrymać ad rasiejskaha ŭradu», — vykazała mierkavańnie ŭ interviju PRAJM‑TASS krynica ŭ dyplamatyčnych kołach Rasiei.
Na minułym tydni prezydent Biełarusi naviedvaŭ redakcyju hazety «Sovietskaja Biełoruśsija» i padčas hutarki z žurnalistami zajaviŭ, što niezadavoleny apošnim vizytam premjer‑ministra Biełarusi ŭ Rasieju.
«Apošni vizyt premjer‑ministra Biełarusi ŭ Rasieju — heta było prynižeńnie! Voś ciapier ja čytaju stenahramu… Ja skazaŭ, kab tudy bolš nia jeździli… Mnie taksama namiakali, što treba pajechać u Kreml i ŭstać na kalena. Ja nie pajedu i na kalena nia stanu», — padkreśliŭ Alaksandar Łukašenka.
Pieršy vice‑premjer Biełarusi Ŭładzimier Siamaška raniej paviedamiŭ, što ŭ časie apošniaha vizytu Siarhieja Sidorskaha ŭ Maskvu było zajaŭlena, što Rasieja adkładaje vyłučeńnie kredytu Biełarusi da kanstryčnika‑śniežnia.
«Tak nam adkazaŭ rasiejski bok na apošniaj sustrečy kiraŭnikoŭ uradaŭ dźviuch krain u Maskvie», — adciemiŭ Uładzimier Siamaška.
