«NN»: Eduard Kanstancinavič, naša miesca ŭ suśvietnym chakiei sapraŭdy ŭ rajonie 14—15 miescaŭ?
EZ: Skažam tak, kali takija vyniki pakazvajucca ŭžo nie ŭ pieršy raz, to možna havaryć, što my stracili svaje byłyja pazicyi.
«NN»: Čamu?
EZ: Heta i praz asłableńnie nacyjanalnaha pieršynstva, uzrovień jakoha padaje štohod. Na žal, uzrovień hulcoŭ nie dazvalaje rašać surjoznyja zadačy, jak, naprykład, źmianić chod niaŭdałaha pajadynku.
«NN»: U siońniašniaj zbornaj pabačyli niejkija śvietłyja plamy?
EZ: Najpierš bramnik Bialinski. Adhulaŭ jon vielmi nadziejna. Padruhoje, heta naša linija abarony. Jana vyklikała pytańni. Adnak spravilisia sa svajoj zadačaj našmat lepiej za napadajučych.
«NN»: Kali b byli lidary, to možna było raźličvać na lepšy vynik?
EZ: U hulniach z takimi kamandami, jak Danija, Narviehija, pry roŭnaści šancaŭ na pieramohu, šmat što vyrašaje padrychtoŭka ŭ peŭny dzień, indyvidualnaje majsterstva. Kali havaryć dastupna, to dobry kiściavy kidok Andreja Kaścicyna moh mnohaje vyrašyć.
«NN»: Jašče 10 hadoŭ tamu my byli prykładna adnaho ŭzroŭniu sa Šviejcaryjaj. Ciapier ža nibyta roznyja płaniety.
EZ: U 2005 hodzie ja pačaŭ pracavać sa zbornaj. I ciapier paraŭnajcie, kolki za hety čas u nas źmianiłasia nie tolki trenieraŭ, ale i viektaraŭ raźvićcia, i kolki ŭ šviejcarcaŭ. Tady ŭsio stanie zrazumieła. Šviejcarcy zatočanyja pad metu, płanamierna išli da hetych pieramoh. U ich nie mianiajecca stratehija ŭ zaležnaści ad nadvorja na vulicy.
«NN»: Na chatnim čempijanacie jość šaniec nie zhańbicca?
EZ: Tearetyčna, tak. Jak i zhulać kiepska. Chacia što takoje «kiepska»? Niekali dla nas trapić u «vaśmiorku» było kiepska. Ciapier ža dziasiataje miesca — heta ŭžo «dobra».
«NN»: Kažuć, što vialikija hrošy sapsavali našych chakieistaŭ.
EZ: Paviercie, šviejcarcy, što hulajuć u nacyjanalnym pieršynstvie, atrymlivajuć nie mienš. Ja nie dumaju, što my staniem hulać lepš, kali źmienšym zarobki. Tut prablema nie ŭ sumach, a nakolki pravilna jany vykarystoŭvajucca.
«NN»: Treniera Skabiełku treba pakidać ci znoŭ mianiać?
EZ: (Śmiajecca). Ja liču, što ŭsio zaležyć ad damoŭlenaściaŭ, na kolki hadoŭ było vyrašana supracoŭničać, pry jakich vynikach praciahvać kantrakt. Nie tolki trenier niasie adkaznaść za vynik, ale i ludzi, jakija zaprašali jaho na pracu.
***
Eduard Zankaviec
naradziŭsia ŭ 1969 u Minsku. Hulaŭ u minskim «Dynama», omskim «Avanhardzie», pieršynstvach Hiermanii, Danii, Finlandyi, nižejšych lihach Paŭnočnaj Amieryki. Dapamahaŭ Hlenu Chenłanu ŭ nacyjanalnaj zbornaj. Ad 2010 da 2011 — hałoŭny trenier zbornaj Biełarusi.