Praŭda — heta dyskredytacyja? 5

Zusim niadaŭna mianie vyklikali ŭ haradzienskaje ŭpraŭleńnie KHB. Razmova išła pra maju publicystyčnuju dziejnaść, a kankretna — jakraz pra artykuły vašaha pakorlivaha słuhi i ścipłaha rupliŭca kłavijatury (raniej kazali — piara) u biełastockaj haziecie «Niva».

Śpiarša mianie aharnuła prafiesijnaja hordaść — značyć niešta vartaje pišu, kali maju takich pilnych i uvažlivych «čytačoŭ». Potym, schamianuŭšysia, ja pryziamliŭ svoj novy sumnieŭny honar — kim ža im jašče zajmacca, kali na ŭvieś trochsottysiačny horad nad Niomanam zastałosia tolki čatyry publicysty — dva biełaruskija i dva polskija, adzin ź jakich užo pryciahvaŭsia da kryminalnaj adkaznaści i siadzieŭ u turmie, a inšyja pieraśledavalisia pakul u bolš miakkich formach. Heta raniej ŭ Harodni byli haziety «Pahonia» i «Birža informacii», niezaležnaje radyjo…

U «vysokim» viedamstvie mnie skazali, što mnohija maje artykuły mohuć padpadać pad kryminalny artykuł ab dyskredytacyi Respubliki Biełaruś. Ale kali žurnalist piša pra toje, što zatrymanaha i niavinnaha čałavieka źbivajuć milicyjanty ŭ pastarunku-to heta dyskredytacyja dziaržavy?

Dyk chto jaje dyskredytuje? Praviadzicie rasśledavańnie pa haračych śladach, zrabicie pravierku pa takim sihnale. Kali žurnalist piša, što ŭ Harodni kiepska chodzić hramadski transpart-to heta dyskredytacyja dziaržavy? To vyleźcie z słužbovych aŭto — i dzień-dva pajeździcie našymi maršrutnymi aŭtobusami, samy pierakanajeciesia. Ci kali žurnalist piša, što ŭ škołach Harodni nie zastałosia anivodnaha paŭnavartasnaha biełaruskamoŭnaha kłasa-to heta niapraŭda?! I što ŭ 1995-ym było zusim nie tak — u pałovie haradzienskich škołaŭ byli biełaruskamoŭnyja kłasy! Ci kali hałoŭny kiraŭnik vobłaści publična (!) zajaŭlaje, što pavodle jaho asabistaha zahadu byŭ zvolnieny vykładčyk univiersitetu (!!!), a žurnalisty pra heta pišuć-to chto dyskredytuje dziaržavu — vysoki načalnik ci žurnalisty?!

A tut užo nia tolki «dyskredytacyja dziaržavy», ale i inšy artykuł Kryminalnaha kodeksu! To my žyviem pavodle zakanadaŭstva Respubliki Biełaruś, ci pavodle staražytnaha vysłoŭja «Quod licet Jovi, pop licet bovi» — «Što dazvolena Jupiteru…»?

Ci kali žurnalisty pišuć, jak niejkija vandały ŭ Dziatłaŭskim rajonie razburyli ŭnikalny budynak młyna na rečcy Moŭčadź, tym samym pazbaviŭšy rehijon cikavaha turystyčnaha abjektu, jaki moh by prynieści dziaržavie dziesiatki tysiač dalaraŭ. Dyk chto ž dyskredytuje RB — žurnalist, jaki pra heta piša, ci miascovy načalničak, jaki addaŭ taki dziki zahad?!

Niama sumnievu, što z žurnalistami ciapierašniaja sistema moža chutka «razabracca» — kožnaha «piśmieńnika» možna pasadzić na paru hadoŭ za kraty, vypchnuć z krainy za miažu albo «niejtralizavać» inšymi, bolš žorstkimi sposabami.

Dośvied takoj pracy ŭ ich histaryčny i vielmi vialiki. Tolki što z taho i što paśla? Haradskija aŭtobusy ad hetaha lepš kursavać nie stanuć, rovień adukacyi ŭ miascovym univiersitecie nie padvysicca, zamiežnyja turysty z valutaj u krainu nie pavalać vałam, a hramadzianie nie pabahaciejuć i ŭładu bolš lubić nia buduć taksama. I kim urešcie jany buduć zajmacca paśla? Novyja «dieła vračiej», pieraśled jakich-niebudź hienietykaŭ, dyrektaraŭ pradpryjemstvaŭ, ci inšych «vrieditielej».

Ale kali «vorahi narodu» skončacca i tam, tady niepaźbiežna prychodzić para «čystki» ułasnych radoŭ. Pa-inšamu nie było, nie byvaje i nia budzie.

Dla tych, chto kiepska pamiataje historyju, nahadaju, što kiraŭniki «ŭsiemahutnych» viedamstvaŭ SSSR — Jažoŭ, Bieryja, Vyšynski i mnohija inšyja skončyli svoj žyćciovy šlach vielmi sumna. Nie kažučy ŭžo pra dziesiatki tysiač šarahovych supracoŭnikaŭ «čeka», «emhebe», «enkavede», jakija vybraŭšy prafiesijaj i pracaj pieraśled inšych, samy stalisia achviarami čałaviekanienaviśnickaj sistemy.

Uładzie treba zrazumieć, što nielha biaskonca zakručvać hajki na kryšcy katła z paraj, inakš vybuch takoha «katła» niepaźbiežny. Uładzie treba zrazumieć, što žurnalisty — heta nie aficyjanty (barani Boh, nie chaču tut pakryŭdzić pradstaŭnikoŭ hetaj patrebnaj ludziam prafiesii) z natatnikam i frazaj «Čieho izvolitie?».

Žurnalist musić być u apazicyi da kožnaj ułady, jon musić jaje krytykavać, vyjaŭlać zahany ŭ hramadstvie, uzdymać aktualnyja prablemy. Heta jaho paklikańnie, heta jaho misija. Jon moža, kaniešnie, niedzie pamylicca ci «pierahnuć pałku» Ale krytykaj i praŭdaj nielha dyskredytavać dziaržavu. Jaje dyskredytujuć zusim inšym.

harodniaspring.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH