Siamaška: Ukraina i Biełaruś majuć namier spynić handlovyja vojny 5

Ukraina i Biełaruś majuć namier na praciahu miesiaca vyrašyć uzajemnyja prablemy ŭ handli, u tym liku adnosna ekspartu i impartu kandytarskich vyrabaŭ. Pra heta zajaviŭ pieršy namieśnik prem'jer-ministra Biełarusi Uładzimir Siamaška pa vynikach pasiadžeńnia Mižuradavaj ukrainska-biełaruskaj źmiešanaj kamisii pa pytańniach handlova-ekanamičnaha supracoŭnictva, jakoje prajšło 22 maja ŭ Kijevie.

«U nas niama dyskryminacyi ŭ handli. Razam z tym nie da kanca razbłakiravana pytańnie pa miasa-małočnaj pradukcyi, pa ŭkrainskaj kandytarskaj pradukcyi, jakaja taksama ŭvachodzić u charčovuju hrupu. Ale na praciahu miesiaca hetyja pytańni buduć vyrašany», — cytuje Siamašku ahienctva UNIAN.

Jon taksama źviarnuŭ uvahu, što Biełaruś vykazvaje značnuju cikavaść da impartu ŭkrainskaj pradukcyi mietałurhii, charčavańnia, sielskahaspadarčaha nasieńnia, pradukcyi ciažkaha mašynabudavańnia, enierhietyčnaha mašynabudavańnia.

U svaju čarhu pieršy vice-premjer Ukrainy Siarhiej Arbuzaŭ vykazaŭ upeŭnienaść, što ŭkrainski i biełaruski baki znojduć razumieńnie pa pytańniach uzajemnaha handlu. «Pierśpiektyvy našych uzajemaadnosin vielmi vysokija. Našy ŭzajemaadnosiny na vielmi vysokim uzroŭni. Tolki sioleta my sustrakajemsia ŭžo druhi raz. Čakajecca sustreča na ŭzroŭni prem'jer-ministraŭ dźviuch krain i, mahčyma, kiraŭnikoŭ dziaržaŭ. My nie možam nie damovicca», — zajaviŭ jon.

Nahadajem, prablemy z pastaŭkami ŭ Biełaruś paŭstali va ŭkrainskich vytvorcaŭ kandytarskich vyrabaŭ u pačatku krasavika. Asacyjacyja «Ukrkandpram», jakaja abjadnoŭvaje ŭkrainskich vytvorcaŭ kandytarskich vyrabaŭ, źviartałasia va ŭkrainskija orhany ŭłady. Pavodle infarmacyi ŭkrainskich ŚMI, pytańnie ŭźnimałasia padčas krasavickich pieramoŭ členaŭ urada Ukrainy z Uładzimiram Siamaškam. «Biełaruski bok abiacaŭ razabracca i situacyju ŭrehulavać, ale čas prajšoŭ, a ŭkrainskaja kandytarskaja pradukcyja na biełaruski rynak tak i nie pastupaje», — paviedamiŭ tady prezident asacyjacyi «Ukrkandpram» Alaksandr Bałdyniuk.

U pačatku maja pieršy vice-premjer Ukrainy Siarhiej Arbuzaŭ daŭ abiacańnie vyrašyć prablemu pastavak ukrainskich kandytarskich vyrabaŭ u Biełaruś. «U nas płanujecca sustreča, mižuradavaja kamisija budzie pracavać. Ja na nastupnym tydni źbiaru ŭsie pytańni i budu vyrašać z uradam Biełarusi», — zajaviŭ Arbuzaŭ.

Tavaraabarot Ukrainy i Biełarusi ŭ 2012 hodzie skłaŭ 7,32 młrd. dołaraŭ. Pa vynikach pieršaha kvartała 2013 hoda tavaraabarot skłaŭ 1,35 młrd. dołaraŭ, što na 3,2% mienš za pakazčyk anałahičnaha pieryjadu 2012 hoda.

0

0

0

0

0

0

Taćciana Karaviankova, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH