Upraŭleńnie Śledčaha kamiteta pa Mahiloŭskaj vobłaści pryniało rašeńnie 23 maja ab uziaćci pad vartu dyrektara AAT «Harbar», jakaja padazrajecca ŭ bujnym kradziažy šlacham złoŭžyvańnia słužbovymi paŭnamoctvami.
Jak paviedamiła aficyjny pradstaŭnik USK Aksana Salaniuk, 10 krasavika supracoŭnikami DAI byŭ zatrymany aŭtamabil AAT «Harbar». «Pry nadhladzie aŭtamabila vyśvietliłasia, što na častku pradukcyi adsutničaje adpaviednaja dakumientacyja. Padčas śledstva ŭstanoŭlena, što kradziež arhanizavała dyrektar pradpryjemstva», — skazała jana. Śledstva miarkuje, što kiraŭnik «Harbara» ŭvajšła ŭ zmovu ź nieŭstanoŭlenymi zamiežnymi hramadzianami.
U mašynie znachodziłasia hatovaja harbarnaja pradukcyja pradpryjemstva, jakaja idzie na pašyŭ skuranych vyrabaŭ. Papiarednie padličany ŭron, naniesieny akcyjaniernamu tavarystvu ŭ vyniku dziejańniaŭ kiraŭnika pradpryjemstva, pavodle źviestak śledstva, składaje bolš jak 60 młn. rubloŭ.
Pieršapačatkova sprava ŭ dačynieńni da jaje była raspačata prakuraturaj Kastryčnickaha rajona Mahilova. Uvieś hety čas dyrektar «Harbara» znachodziłasia pad padpiskaj ab niavyjeździe.
Jak adznačajuć va ŭpraŭleńni Śledčaha kamiteta, dyrektar pryznała svaju vinu. Śledčyja praciahvajuć vyśviatleńnie ŭsich akaličnaściaŭ kryminalnaj spravy.
