Były staršynia Viarchoŭnaha Savietu nie nazyvaje tych, chto padtrymaŭ jahonuju kandydaturu. Kaža tolki, što siarod ich niekalki dziejučych kiraŭnikoŭ krain śvietu, byłyja hieneralnyja sakratary, prezydenty, premjery, prafesary ŭniversytetaŭ.
 Stanisłaŭ Šuškievič |
«Sytuacyja raźvivałasia vielmi chutka i niečakana dla mianie, — paviedamiŭ «Našaj Nivie» były staršynia biełaruskaha parlamentu. — Naprykancy minułaha hodu ja čytaŭ lekcyi ŭ Poznańskaj vyšejšaj palityčnaj škole, jakuju patranuje były lider «Salidarnaści» i prezydent Polščy Lech Vałensa. U adzin dzień ja zajšoŭ u kabinet kanclera škoły ŭ toj momant, kali jon razmaŭlaŭ pa telefonie z Vałensam. Lech paprasiŭ, kab słuchaŭku pieradali mnie, jon zaprasiŭ pryjechać u toj ža dzień da jaho ŭ Hdańsk. Mianie vyzvalili ad zaniatkaŭ i ja nasamreč pajechaŭ da Vałensy. My sustrelisia ŭ jahonym biuro, jakoje raźmiaščajecca ŭ cudoŭnym dvuchsothadovym budynku. Vałensa amal adrazu paviedamiŭ, što choča vyłučyć mianie na Nobeleŭskuju premiju miru za 2007 hod. Pryznajusia ščyra, što dla mianie heta było poŭnaj niečakanaściu, bo pa telefonie jon ničoha mnie nie skazaŭ. Vałensa maje prava vyłučać na Nobela, bo sam atrymlivaŭ premiju ŭ 1983 hodzie. Jon paprasiŭ mianie napisać nievialikija bijahrafičnyja źviestki. Paśla čaho i nakiravaŭ zajavu ŭ Narveski nobeleŭski kamitet. Ja pakul nie chaču nazyvać tych ludziej, chto jašče vystupaje za maju kandydaturu. Skažu tolki, što siarod ich niekalki dziejučych kiraŭnikoŭ krain śvietu, byłyja hieneralnyja sakratary, prezydenty, premjery, prafesary ŭniversytetaŭ».
Stanisłaŭ Šuškievič na Nobeleŭskuju premiju miru byŭ vyłučany pa piaci nastupnych punktach: 1. Inicyjatyva i realizacyja vyvadu taktyčnaj i stratehičnaj jadziernaj zbroi z terytoryi Biełarusi; 2. Za inicyjatyvu sustrečy ŭ śniežni 1991 hodu kiraŭnikoŭ Biełarusi, Rasiei i Ŭkrainy, jakija padpisali Biełavieskija pahadnieńni, što faktyčna zamacavali razvał SSSR; 3. Za aktyŭny ŭniosak ŭ mirny raskoł rasiejskaj kalanijalnaj imperyi, jakaja isnavała ŭ vyhladzie Savieckaha Sajuzu; 4. Za ŭkład u bieskanfliktnaje pieraŭtvareńnie SSSR u niezaležnyja respubliki; 5. Za addanaść pryncypam miru, demakratyi, pravoŭ čałavieka i prapahandu hetych pryncypaŭ.
Laŭreat Nobeleŭskaj premii ŭ halinie miru stanie viadomy ŭ druhoj pałovie kastryčnika ŭ Osła (Narvehija).
Usiaho na premiju štohod vyłučajecca kala 200 kandydataŭ. Siarod viadomych naminantaŭ hetaha hodu — eks‑vice‑prezydent ZŠA Albert Hor za svaju dziejnaść u abaronu navakolnaha asiarodździa, miratvorac Namibii, Ačechu j Kosava Marci Achcisaary, čačenskaja jurystka Lidzija Jusupava. Praŭda, favaryty redka akazvajucca abranymi.
Letaś na Nobela miru vyłučali kiraŭnika niezarehistravanaj pravaabarončaj arhanizacyi «Viasna» Alesia Bialackaha.
Šuškievič usprymaje svaje šancy jak nia samyja vysokija. «Maju šancaŭ paŭpracenta, – śmiajecca Šuškievič. – Mnie vielmi pryjemna, što ja trapiŭ u hety śpis, ale zastajusia realistam, što aproč mianie šmat hodnych kandydatur. Kali ŭsio ž atrymaju, to najpierš chaču dapamahčy «Našaj Nivie» i inšym niezaležnym vydańniam».
