26 červienia 29-hadovuju žycharki horada Uradzijeŭka (Mikałajeŭskaja vobłaść Ukrainy) znajšli raspranutaj i žorstka źbitaj, paviedamlaje Gazeta.ua. Paźniej jana raskazała, što jaje zaciahnuli ŭ aŭto dva supracoŭniki milicyi i miascovy taksoŭščyk. Lejtenant Dźmitryj Pališčuk i staršy lejtenant Jaŭhien Dryžak žorstka źbivali dziaŭčynu i hvałtavali, taksist Rabinienka tolki źbivaŭ.
Lejtenanta Pališčuka i taksoŭščyka zatrymali. Staršy lejtenant Dryžak, pa infarmacyi śledstva, nibyta mieŭ alibi — u tuju noč dziažuryŭ u adździaleńni.
Historyja aburyła žycharoŭ Uradzijeŭki. Kala pastarunka milicyi sabrałasia kala tysiačy miascovych žycharoŭ. Prysutničali nie tolki rodnyja i siabry zhvałtavanaj dziaŭčyny, ale i siemji inšych paciarpiełych ad dziejańniaŭ miascovaj milicyi, pišuć ukrainskija ŚMI.
U noč na paniadziełak pratestoŭcy pasprabavali ŭziać šturmam budynak milicyi. Nahodaj stała źjaŭleńnie ŭ aknie rajadździeła adnaho z padazravanych — Dryžaka. U vokny palacieli kamiani, milicyja adkazała hazam z bałončykaŭ i musiła chavacca ŭ sutareńniach.
Pavodle pradstaŭnikoŭ miascovych apazicyjnych partyj, jakija ładziać paralelnaje rasśledavańnie, staršy lejtenant Dryžak nie maje alibi. Pa infarmacyi miascovych žycharoŭ, u budynku milicyi jość čorny vychad, jakim rehularna karystajucca dziažurnyja milicyjanty. Jany ŭvachodziać praz hałoŭny ŭvachod, rehistrujucca ŭ dziažurcy, a pa patrebie nieaficyjna pakidajuć pamiaškańnie praz zapasny vychad.
Žychary Uradzijeŭki zastajucca kala adździaleńnia milicyi, jany patrabujuć aryštu Dryžaka.
